Նոր տվյալներ պայթյունից տուժած մոր և որդու մասին

Կոտայքի մարզի Հրազդան քաղաքում Միկրոշրջան 32 շենքի  բնակարաններից մեկում երեկ տեղի ունեցած պայթյունի հետևանքով տուժած երկու քաղաքացիները գտնվում են Երևանի Ճառագայթային բժշկության և այրվածքների հանրապետական գիտական կենտրոնում:Կենտրոնի տնօրեն Նորայր Դավիդյանը newspress.am-ի թղթակցի հետ զրույցում տեղեկացրեց, որ տուժածները մայր և որդի են ՝ Էլզա Մանուչարյանն ու Սարմեն Հակոբյանը:

Բժշկի խոսքով՝ երկուսն էլ ունեն շնչուղիների այրվածքներ, ինչը բարդացնում է իրավիճակը: Բայց մոր վիճակը ավելի ծանր է: Երկուսն էլ արդեն շոկից դուրս են եկել: «Ամեն ինչ արվում է նրանց օգնելու համար»,- ասաց նա՝ ավելացնելով, որ տղայի այրվածքների մակերեսը քիչ է։ Կնոջ այրվածքները կազմում են մարմնի մակերեսի 50%-ը:

Հիշեցնենք, որ նոյեմբերի 12-ին, ժամը 19.12-ին ահազանգ է ստացվել, որ Կոտայքի մարզի Հրազդան քաղաքի Միկրոշրջան թաղամասի թիվ 32 շենքում բնակարաններից մեկում պայթյունի ձայն է լսվել, այնուհետև հրդեհ է բռնկվել:

Դեպքի վայր է մեկնել մեկ մարտական հաշվարկ:
Պարզվել է, որ թիվ 27 բնակարանում 3 կգ-անոց գազի բալոնից տեղի է ունեցել արտահոսք՝ բռնկումով, ինչի հետևանքով բնակարանի վարձակալ Է. Մ.-ն (ծնվ. 1947թ.) և Ս. Հ.-ն (ծնվ. 1994թ.), մինչ հրշեջ-փրկարարների կանչի վայր հասնելը, տեղափոխվել են Հրազդան քաղաքի ԲԿ. բժիշկները Ս.Հ.-ի առողջական վիճակը գնահատել են միջին ծանրության, իսկ Է.Մ.-ինը՝ ծանր:

Տուժածները տեղափոխվել են Երևանի «Ճառագայթային բժշկության և այրվածքների հանրապետական գիտական կենտրոն» ՓԲԸ: Հրդեհը մեկուսացվել է ժամը 19.31-ին, մարվել՝ 19.40-ին: Հյուրասենյակում մասամբ այրվել են սեղանը, անկողինը, գորգը, վարագույրն ամբողջությամբ, կոտրվել են պատուհանի ապակիները: