«Հաճախորդին էշի տեղ են դնում». «Զիմ» մարկետն իր կամայական գներն է թելադրում՝ արհեստական գնաճ ձևավորելով (ֆոտո)

Սևանի «Զիմ» սուպերմարկետում ակնհայտ խաբեություն է։ Ապրանքների գնապիտակների թվերը չեն համապատասխանում համակարգչում ֆիքսված թվերի հետ։

Գնորդներից մեկն ահազանգել է NEWSPRESS.am-ին այն մասին, թե ինչպես է դարձել մարկետի աշխատակազմի կամայականությունների հերթական զոհը։

Նա վերցրել է յուղ, որի գինը գնապիտակով եղել է 1680 դրամ, սակայն, ինչպես հետո է պարզվել, իրականում համակարգչով ֆիքսված գինը եղել է 1820 դրամ։

«Ասում եմ, բայց այսքան էր գրված, իրար մեջ ճշտեցին, որ գրվածը սխալ է, որ դեռ չեն հասցրել փոխել»,-պատմում է մեր զրուցակիցը, ով չի զլացել և դուրս խալով խանութից՝ մտել է նաև մոտակայքում գտնվող ուրիշ երեք խանութ։

zim-spy

«Պատկերացնո՞ւմ եք, նույն յուղը բոլոր տեղերում 1650 դրամ էր»,- նեղսրտած պատմում է կինը և հավելում․«Հարցն այն չէ, թե տարբերությունը 100-170 դրամ է, այլ այն, որ հաճախորդին էշի տեղ են դնում, և հենց դրա համար նրանց պետք է պատժել, որ չհիմարացնեն մարդկանց»։

Հարկ է նկատել նաև, որ քաղաքացին չի բավարարվել միայն իր դժգոհությունն աշխատողներին հայտնելով, նա նաև զանգահարել է տնօրեին, ով մեկնաբանել է, թե նոր աշխատողներ կան ու երևի դեռ ծանոթ չեն գներին ու շփոթվել են։

Այստեղ արդեն մարդուն կարծես լրիվ հիմարի տեղ են դնում։

Ըստ ցանկացած սուպերմարկետի, մարկետի ու մինի մարկետի կանոնակարգի՝ ոչ մի աշխատող իրավունք չունի մուտք գործել համակարգիչ և փոխել ապրանքի գինը։ Դա անում է ադմինիստրատորը կամ տվյալ խանութի մենեջերը։

Ու ապրանքի գնի տարբերությունը բացատրել աշխատողների՝ գներին ծանոթ չլինելու փաստով, պարզապես անհեթեթություն է։

Բացի այդ, փաստն այն է, որ «Զիմ» մարկետի կամայականությունների հետևանքով՝ արհեստական գնաճ է ձևավորվել։ Սա այն դեպքում, երբ արդեն նույնիսկ երկրի ղեկավարի մակարդակով հրահանգվել է խիստ ուշադրություն դարձնել ու վերահսկել շուկան՝ կամայական գնաճերից խուսափելու համար։