Իշխանությունը 7 մլրդ դոլար է դրել ժողովրդի շալակը

ՀՀ փաստացի պետական պարտքը 2016 թվականին 2.631 մլրդ, 2017 թվականի դեկտեմբերին 2.992 մլրդ, իսկ 2018 թվականին 3.173 մլրդ դրամ է:

2018 թվականին ՀՀ պետական պարտքի սպասարկմանը կուղղվի 140.5 մլրդ դրամ, որից 62.4 մլրդ դրամը ներքին տոկոսավճարներ են, 78.1 մլրդ դրամը՝ արտաքին։

Նշենք, որ 2018 թվականի բյուջեի ծախսային մասը 1 տրլն 464.2 մլրդ դրամ է։ ՀՀ բյուջետային ծախսերի 10%-ն ուղղվելու է պետական պարտքի սպասարկմանը։

2017 թվականի բյուջեով պետական պարտքի տոկոսավճարների գծով նախատեսվում էր 120.3 մլրդ դրամ։ Պետական պարտքի սպասարկման բեռը 20 մլրդ դրամով ավելացել է։

Հավելենք, որ առաջիկա տարիներին այդ բեռն է՛լ ավելի է ծանրանալու․ կառավարությունը շարունակում է վարկեր վերցնել, մյուս կողմից վճարվելու են նախկին վարկերի տոկոսավճարները։

2018-ին արդեն պետական պարտքը կազմում է 7 մլրդ դոլարից ավելի։

Թեև կառավարությունը ՀՀ իրավիճակի վատթարացում չի տեսնում, սակայն ունենալ 7 մլրդ դոլար պարտք, երևի թե արդեն անհանգստություն է։

Պաշտոնյաները հաճախ են նշում, որ վարչարարության հաշվին բարելավվելու են ՀՀ պետբյուջեի եկամուտները։ Իհարկե, կավելանան, քանի որ այս ընթացքում բոլոր գերատեսչություններում կրճատումներ են եղել, մարդիկ մնացել են առանց աշխատանքի և աշխատավարձի, չեն ավելացել աշխատավարձերը և թոշակները։

Այս տարիներին հետևողականորեն տեղի է ունենում վարկեր վերցնելու քաղաքականություն, որը ցանկացած երկրի համար է կործանարար։ Երկրի տնտեսությունը զարգացնելու, հարկային բեռը թեթևացնելու փոխարեն՝ իրավիճակը ծանրացնում են։

Այնպես չէ, որ երկրում փող չկա, միայն վերջին 10 տարում երկրից դուրս է եկել 10 մլրդ դոլար գումար, և դրա համար որևէ մեկը պատասխան չի տվել, եթե չկա պատիժ, ապա արժույթի արտահոսքը երկրից կշարունակվի։

Հարց է առաջանում, թե ինչո՞ւ է կառավարությունն ամեն դատարկ ծրագրի համար վարկ վերցնում, պատասխան՝ որովհետև վարկերի զգալի մասը հոսում է մեծ ու փոքր պաշտոնյաների գրպանները, այնտեղից՝ օֆշոր, իսկ ինչո՞ւ է պետք ՀՀԿ իշխանապետությունը շարունակել, պատասխան՝ որովհետև վաղուց որևէ ազնիվ ՀՀԿ-ական չի մնացել, և ցանկացած ՀՀԿ-ականին քչփորելուց՝ միլիոններ են թափվելու, օֆշորը չհաշված։

Այնպես որ՝ ՀՀԿ-ական իշխանության շարունակության դեպքում ՀՀ վարկերը և պետական պարտքն ավելանալու է, տարեկան սպասարկման վճարները փակվելու են պետբյուջեի հաշվին․ առաջիկա տարիներին նման հաշվարկներով ո՛չ թոշակները, ո՛չ աշխատավարձերը չեն բարձրանալու, եթե Հայաստանում ինչ-որ բան է ավելանալու, ապա արտագաղթը, աղքատությունը։