Դավոսում Ադրբեջանը չհերքեց, որ ՌԴ-ից ստացված զենքը տարվել է առաջնագիծ

Ադրբեջանն Արցախը դիտարկում է որպես մի կտոր հող, որը պտք է ունենալ իրենց կազմում, և իր նպատակին հասնելու համար նա զինվում ու փորձում է արդարացնել իրեն միջազգային հարթակում։ Այս մասին լրագրողների հետ զրույցում ասաց ԱԺ Արտաքին հարաբերությունների հանձնաժողովի նախկին նախագահ, միջազգային հարցերով փորձագետ Հովհաննես Իգիթյանը։

«Դավոսում Ադրբեջանը չհերքեց, որ ՌԴ-ից ստացված զենքը տարվել է առաջնագիծ՝ իր հրամանի համաձայն, իսկ դա նշանակում է, որ Ադրբեջանը զինվում է այն նպատակով, որ ԼՂՀ հարցը լուծի ռազմական ճանապարհով»,- նշեց Հովհաննես Իգիթյանը՝ հավելելով, որ երբ լարված է սահմանին, ու Ադրբեջանը կրակում է, Հայաստանը պետք է ասի, որ հնարավոր չէ խոսել որևէ բանակցությունների մասին:

Նրա դիտարկմամբ՝ Արցախը պետք է ներառել բանակցային գործընթացի մեջ, քանի որ ԼՂՀ-ն պետք է ուղղակի կամ անուղղակի մասնակցություն ունենա և իր տեսակետը ներկայացնի:

«Եթե այս պահին Արցախը բանակցություններում կամ հանդիպումներում ինչ-որ կերպ մասնակցություն չունենա՝ թեկուզ հայտարարությունների, գրավոր դիմումների և այլնի տեսքով, ապա Ադրբեջանի քաղաքականությունը, թե Արցախի հարց չկա, այլ զուտ 2 պետությունների կռիվ է մի կտոր հողի համար, կդառնա իրականություն, ինչն անթույլատրելի է»,-նկատեց Իգիթյանը:

Նա նկատեց, որ խնդրի ցավոտ կողմը նաև այն է, որ Ադրբեջանին զենք մատակարարում է Հայաստանի դաշնակից պետությունը։

«Ի վերջո, այդ զենքը, որ գալիս է Ադրբեջան, ինչքա՞ն ու ինչո՞ւ է գալիս այն երկրներից, որը համարվում է ՀՀ դաշնակիցը: Սա շատ ցավոտ հարց է, և այն պետք է բարձրացվի, բայց մեր իշխանությունները բարդույթ ունեն ՌԴ-ին ասելու համար: Նույնիսկ ԵԽԽՎ-ում հարցեր կային, որ պիտի շոշափվեր ՌԴ-ի անունը, բայց ամեն կերպ «Ռուսաստան» ասելը շրջանցվեց: Հիմա պետք է բարձրաձայնվի, քանի որ ընդհանուր մոտեցում կա, որ կոնֆլիկտային տարածքներ զենք չպետք է մատակարարվի»,-նկատեց Հովհաննես Իգիթյանը: