Երբեմնի մարդաշատ Ֆիրդուսից հիմա մնացել են միայն կողպված տնակները․ Ի՞նչ տեսք ունի հիմա Ֆիրդուսի շուկան (լուսանկարներ)

2017 թվականի հուլիսի 19-ից Երևանի Ֆիրդուսի շուկայում սկսվեց լարված իրավիճակը։ Տարածք բերվեց շինտեխնիկա, որն էլ սկսեց տարածքի ապամոնտաժման աշխատանքները։ Շինտեխնիկան քանդեց շուկայի ծածկը (նավեսները), տարածքից սկսեցին հեռանալ առևտրականները։ Շուկան լքեցին առևտրականները, գնորդները սկսեցին մոռանալ շուկայի մասին, իսկ տարածքի բնակիչները սկսեցին մտածել իրենց ապագայի մասին։

firdus1

Հիմա Ֆիրդուսի շուկայում դատարկություն է և այլևս չկա առաջվա առևտրային աժիոտաժը։ Երբեմնի նավեսների փոխարեն հիմա երևում է բաց կապույտ երկինքը, իսկ նախկին առևտրային տնակների դռները կողպված են շատ պինդ։ Կողպված են, քանի որ տնակների տերերը գիտեն, որ այդ դռներն այլևս չեն բացվելու։

firdus4

Եթե նախկինում անհնար էր տեսնել, փողոցն ու պատկերացում կազմել, որ տարածքում կան շենքեր ու բնակիչներ, ապա հիմա այդ ամենը տեսանելի է։ Ֆիրդուսում կատարյալ դատարկություն է։ Շուկայի մեջտեղում նստած է մի տարեց կին, ով իր ամբողջ կյանքն անցկացրել է շուկայում։ Սակայն հիմա նստած է միայնակ։ Ցրտից կծկել է մարմինն ու անգամ զրուցակից չունի։

NEWSPRESS.am-ի հետ զրույցում վաճառական կինը նշեց, որ Ֆիրդուսի տարածքի շենքերը մինչ օրս չեն կարողանում քանդել, քանի որ բնակիչներին առաջարկում են շատ քիչ գումար։

firdus3

«Բնակիչներին քիչ փող են տալիս, իսկ բնակիչները չեն ցանկանում լքել այս տարածքը։ Ամառը քանդեցին նավեսներն, ու այդ օրվանից հետո էլ ոչ ոք չի եկել։ Ֆիրդուսում կա մոտ 3-4 շենք ու բոլոր շենքերում էլ բնակիչներ կան։ Կարելի է ասել, որ ոչ ոք չի լքել իր բնակարանը, քանի որ առաջարկում են քիչ գումար»։

firdus

Վաճառական կինը գանգատվեց, որ առևտուր չկա, ու գրեթե միայն ինքն է մնացել այստեղ ու ամբողջ օրվա ընթացքում 1-2 մարդ հազիվ է անցնում այս տարածքով։

«Հիմա այս տարածք ոչ ոք չի գալիս, քանի որ բոլորը գիտեն, թե Ֆիրդուսը փակել են, ու ոչ մի առևտրական չկա այստեղ։ Ոչ ոք չի ցանկանում նորից վերադառնալ այստեղ, քանի որ ամռանը եկան ու գազանավարի քանդեցին նավեսները։ Այդ ամենը տեսնելուց հետո էլ ո՞վ կգա։ Այդ օրերից հետո մի մասը գնաց ու տեղավորվեց այլ տոնավաճառներում, ոմանք մնացին տանը, իսկ մի 3-4 հոգի էլ դեռ շարունակում է գալ ու կանգնել այստեղ, սակայն անօգուտ»։

firdus2

Ֆիրդուսում դեռ քարացած ու լքված վիճակ է, քանի որ տարածքի բնակիչներին խաբում են ու առաջարկում վատ պայմաններ։ Այս ամենի մասին մանրամասն կներկայացնենք հաջորդիվ։