Ի՞նչ է սպասվում գյուղատնտեսությանը

Վերջին տարիներին ոռոգման ջրի վատ մատակարարման հետևանքով Հայաստանի գյուղատնտեսությունը հայտնվել է ծանր վիճակում. բերքը ստացվում է քիչ կամ վատորակ: Ոռոգման ջրի նման մատակարարման համար նաև խնդիրներ է ստեղծում ՀԷԿ-երի ցանցը, քանի որ այս կառույցները վերցնում են գետի ջրի հիմնական հատվածը՝ չպահպանելով սահմանված նորմաները, և ոռոգման ցանց քիչ ջուր է մատակարարվում:

2016-ի ձմռանը բավականին տեղումնառատ էր, և այդ դեպքում էլ ջրամբարները, ըստ պաշտոնական հաղորդագրությունների, չէին լցվել և չկարողացան ապահովել նորմալ ջրամատակարարում: Իսկ ի՞նչ կլինի այս տարի:

Եթե նախորդ տարի մեծաքանակ տեղումների պարագայում ոռոգման ջրի պակաս էր նկատվում, և Սևանա լճից լրացուցիչ 100 մլն խմ ջրառ իրականացվեց, այս տարի ենթադրվում է` պիտի Սևանը դատարկեն, որ կարողանան ոռոգում ապահովել:

ՀԷԿ-երի սեփականատերերի մոտ արդեն անհանգստություն կա՝ այս տարվա «չորային» ձմռան հետ կապված, և եթե գարունն էլ շարունակվի այսպես ու տեղումներ քիչ լինի, ապա ՀԷԿ-երի արտադրած էլէներգիայի կարիքը քիչ կլինի: Կրկին կսրվի նաև ոռոգման հարցը՝ այս անգամ լրիվ հիմնավոր:

Այն, ինչ արհեստական «ստեղծագործեցին» նախորդ տարիներին, թե՝ «երաշտ է, ջուր չկա» (որպեսզի, հանրությանը դեռևս  անհայտ պատճառներով, Սևանից լրացուցիչ ջրառ իրականացնեն), այս տարի կարիք էլ չի լինելու ստեղծագործել, և չարագուշակ «ագռավը կռկռալու է» լրիվ հիմնավոր: Իսկ թե ի՞նչ են հորինելու այս տարի, որ ջուր վերցնեն Սևանից, շատ սպասելու կարիք չկա:

Ձմեռային անսովոր տաք եղանակային պայմաններում բնությունն արդեն արթնանում է. մարզեր կան, որտեղ ծառերը բողբոջել, անգամ ծաղկել են: Եթե փետրվարին ջերմաստիճանի նվազում արձանագրվի, ապա ցրտահարությունը մեծ հարված է հասցնելու առանց այն էլ զգայուն գյուղատնտեսությանը և գյուղոլորտին, իսկ ցրտահարություն չդիտվելու պարագայում, միևնույնն է, փոփոխված կլիմայի պայմաններում դեռևս անհայտ է, թե ինչպիսի բերք է սպասվում՝ և՛ քանակի, և՛ որակի առումով:

Վերջին տարիներին պատասխանատուներն այնքան խոսեցին ոռոգման ջրի պակասի մասին, որ իրոք ջուրն այս տարի քիչ է լինելու. դրա հիմքերը կան՝ չեղած երաշտը «երաշտով» են փակում, իսկ ի՞նչ են անելու իրական երաշտի դեպքում:

NEWSPRESS.am