«ՀԺ». Մովսես Հակոբյանը՝ գեներալիտետի փակ հանդիպումների և Վիգեն Սարգսյանի դեմ «արշավի» մասին

«Հայկական ժամանակ» թերթը գրում է.

«Մեր տեղեկություններով՝ գեներալիտետի փակ հանդիպումները դադարեցվել են: Օրեր առաջ գրել էինք, որ ՀՀԿ շրջանակներում քննարկվում է ՀՀ պաշտպանության նախարար Վիգեն Սարգսյանի պաշտոնանկության հարցը, իսկ գեներալիտետը պաշտպանության նախարարի իր թեկնածուն ունի և պարբերական հանդիպումներ է սկսել՝ իր թեկնածուին պաշտպանության նախարարի պոստ տեղափոխելու ուղղությամբ:

Իշխանական նեղ շրջանակներում խոսվում էր, որ մամուլում Վիգեն Սարգսյանի դեմ սկսած արշավի հետևում հենց գերենալիտետն է կանգնած, մասնավորապես, ՀՀ զինված ուժերի գլխավոր շտաբի պետ Մովսես Հակոբյանը, որից Վիգեն Սարգսյանը ցանկանում է ազատվել այնպես, ինչպես ազատվեց ԳՇ պետի տեղակալ Հայկազ Բաղմանյանից:

Գեներալիտետի վերջին հանդիպումը, ըստ մամուլի տեղեկությունների, եղել է մի քանի օր առաջ. Հանդիպել են ՀՀ պաշտպանության նախկին նախարար Սեյրան Օհանյանն ու ԶՈՒ ԳՇ պետ Մովսես Հակոբյանը:

ՀԺ-ն փորձեց այլ մեկնաբանություն ստանալ անձամբ Մովսես Հակոբյանից:

Պարոն Հակոբյան, մամուլում գրվել է, որ դուք եւ Սեյրան Օհանյանը օրերս հանդիպել եք եւ երեք ժամ զրուցել, ինչ-որ արտառոց բա՞ն կար, հերքո՞ւմ եք, թե հաստատում այդ լուրը, եւ ի՞նչ կասեք գեներալական կազմի հանդիպումների մասին:

Ինձ հետաքրքիր չեն էդ գրածները:

Բայց անընդհատ խոսվում է…

Էնքան խոսացեք, դուք խոսացեք, ձեր կայքերը չեմ նայել ձեր գրածները ու ինձ պետք չի, ես ուրիշ բան եմ անում:

Իսկ ձեր պաշտոնանկության մասին խոսակցություննե՞րը:

Ես գիվանդ խոսակցությունները չեմ կարող ոչ մեկնաբանել, չգիտեմ, դուք ձեր գործով զբաղվեք, մենք մեր գործով զբաղվենք:

Պարոն Հակոբյան, խոսվեց նաև, որ Վիգեն Սարգսյանի դեմ մամուլում սկսված արշավի հետևում նաև դուք եք կանգնած:

Հիվանդ եք դուք, էդ հիվանդներին տարեք, հոգեբուժարանում հարցրեք: Ես հիվանդների հետ չեմ կարող զրուցել»:

Մանրամասները՝ թերթի այսօրվա համարում