Ամեն ինչ արհեստական է. Թևան Պողոսյանը՝ ՀՀ -րդ նախագահի ընտրության մասին (տեսանյութ)

«Արմեն Սարգսյանն, իմ պատկերացմամբ, եղածներից լավագույնն է, բայց դա չի նշանակում, որ մեր երկրում չկան այլ թեկնածուներ»:  Անդրադարձ» մամուլի ակումբում հրավիրված մամուլի ասուլիսի ժամանակ այդ մասին ասաց «Մարդկային զարգացման միջազգային կենտրոնի» նախագահ, փորձագետ Թևան Պողոսյանը՝ անդրադառնալով Արմեն Սարգսյանի թեկնածությանը՝ ՀՀ 4-րդ նախագահի պաշտոնում:

Արմեն Սարգսյանը Թևան Պողոսյանի համար ընդունելի թեկնածու է, անընդունելին այն է, որ այլընտրանք չկա:

«Վստահ եմ, որ Արմեն Սարգսյանի համար ավելի հետաքրքիր կլիներ մրցակցային դաշտում ցույց տալ, թե ով է ինքը»,-ասաց նա և օրինակ բերեց, որ «Ելք»-ի առաջարկած թեկնածուն՝ Արտակ Զեյնալյանը, նույնիսկ չի կարողանալու գրանցվել, դիտարկվել որպես նախագահի թեկնածու:

Այն, որ այլ ուժեր թեկնածուներ չեն առաջարկել, ըստ Թևան Պողոսյանի, քաղաքական մշակույթի բացթողումն է:

«Եթե ես քաղաքական կուսակցություն եմ կամ միավոր ու գնացել եմ իշխանություն՝ քվե ստանալու, ուրեմն պետք է պատրաստ լինեմ թեկնածու ունենալ նաև նախագահի ու նախարարների պաշտոնների համար»:

Փորձագետը երկրորդ փուլ չի կանխատեսում:

«Այն վարքագծով, որով այսօր առաջնորդվում են թեկնածուի առաջադրման և ընտրության հարցում, ես չեմ տեսնում երկրորդ փուլ: Այ, եթե մի քանի թեկնածու լինեն՝ հնարավոր է։ Ամեն ինչ արհեստական է»,-ընդգծեց Թևան Պողոսյանը:

Ասուլիսն ամբողջությամբ՝ NEWSPRESS.am-ի տեսանյութում