Ժոզե Մոուրինյոն՝ սատանա, իսկ Արսեն Վենգերը՝ հրեշտակ. Մխիթարյանի «մեդալի երկու կողմերը»

Վերջապես կայացավ ձմեռային տրանսֆերային պատուհանի ամենադրամատիկ տրանսֆերը: Մխիթարյանն արդեն «Արսենալում» է, իսկ Սանչեսը՝ «Մանչեսթեր Յունայթեդում»: Տրանսֆերն իրականացավ, ֆուտբոլիստները խոսեցին նոր ակումբների, մարզիչները՝ ֆուտբոլիստների մասին: Ժոզե Մոուրինյոն նշեց, որ Մխիթարյանը մեծապես նպաստել է Եվրոպա լիգայի գավաթի նվաճման գործում և ինքը երբեք չի մոռանա հայ ֆուտբոլիստին:

Արսեն Վենգերն էլ իր հերթին խոսեց Մխիթարյանի մասին, ներկայացրեց նրա լավ կողմերը: Հատկանշականն այն է, որ հայ երկրպագուներն ուրախ էին, որ Հենոն ազատվեց Մոուրինյոյից: Այստեղ նկատվում է, որ Մխիթարյանի տեղափոխության միակ մեղավորը Ժոզեն էր, սակայն մյուս կողմից նկատվում էր, որ Մխիթարյանի մոտ կա խաղային անկում:

Հենց տեղափոխության առաջին օրն Արսեն Վենգերը շատ դրական խոսեց Հենրիխ Մխիթարյանի մասին: Արսեն Վենգերը միշտ էլ գնահատել է իր բոլոր ֆուտբոլիստներին: Բնականաբար, լինում են կոնֆլիկտներ մարզչի ու ֆուտբոլիստների միջև: Արսեն Վենգերն «Արսենալի» մարզիչն է՝ սկսած 1996 թվականից ու այդ ժամանակաշրջանից մինչ օրս Վենգերը հայտնի է որպես ֆուտբոլիստներ բացահայտող, շատ ուժեղ մակարդակի հասցնող մարզիչ: Սակայն այս ամենի հետ մեկտեղ, սովորաբար, «Արսենալում» կայացած ֆուտբոլիստները հեռանում են ակումբից: Վենգերը կարողանում է ստեղծել լավ կոլեկտիվ, ստեղծել թիմային ուժեղ ակումբ: Նա հարգում է իր ֆուտբոլիստներին և երբեք չի կոտրում նրանց:

Վենգերը սիրում է խաղալ հարձակվողական ֆուտբոլ, իսկ Մխիթարյանը ֆուտբոլիստ է, ով պիտի խաղա ու իր ամբողջ կարողությունները ցույց տա հարձակվողական ֆուտբոլում, այլ ոչ թե պաշտպանողականում:

Ֆուտբոլիստներին հարգելու, սիրելու, մարզչական կարողություններն ու թիմային խաղ ստեղծելու կարողությունները Վենգերի ամենագլխավոր հատկանիշներից են, որոնք իդեալական են Հենրիխի համար: Հակառակ կողմում Ժոզե Մոուրինյոն է, ով ավելի շատ կործանել է լեգենդար ու ուժեղ ֆուտբոլիստների, քան աչքի է ընկել մեծ հաջողություններով: Ուղղակի Ժոզեն ժամանակակից ֆուտբոլի ամենախարիզմատիկ կերպարներից մեկն է, որին չհետևելն անհնար է:

Ստացվում է այնպես, որ Մխիթարյանը մի քանի տարվա մեջ առնչվել ու ապագայում առնչվելու է երկու հակառակ բևեռների հետ, երկու տարբեր մարզիչների ու մարդկանց հետ: Անգլիացի մասնագետներն ու ֆուտբոլասերները վստահ են, որ Մխիթարյանի ու Վենգերի աշխատանքն իդեալական կլինի: Իդեալական կլինի թիմային ու հարձակվողական խաղը, քանի որ «Մանչեսթերում» ավտոբուսային ֆուտբոլ էր, Ժոզե Մոուրինյոն էր ու հոգեբանորեն կաշկանդված Մխիթարյանը, ով յուրաքանչյուր խաղից հետո քարկոծվում էր Մոուրինյոյի կողմից, իսկ շատ քիչ դեպքերում էլ՝ գովաբանվում: Սակայն մնում է փաստ, որ Մխիթարյանին դրական հրաժեշտ տվեց Ժոզեն:

Մխիթարյանին դրական դիմավորեց նաև Արսեն Վենգերը: Մնում է, որ այս դրական, լավ ու հիասքանչ էմոցիաներից ու իրադարձություններից հետո իրեն արդարացնի հայ ֆուտբոլիստը: Իսկ այդ ամենից հետո երկրպագուները կտեսնեն Մխիթարյանի հիանալի ֆուտբոլն ու «Արսենալի» երկրպագուների հիասքանչ երգերը:

NEWSPRESS.am Sport