ԵՀՄՖ նախագահ դոկտոր Աշոտ Գրիգորյանն Էրդողանի նկատմամբ իր սպառնալիքը սկսել է իրականացնել

Ինչպես արդեն գիտեք, Եվրոպայի հայկական միությունների ֆորումը (ԵՀՄՖ)՝ նախագահ դոկտոր Աշոտ Գրիգորյանի գլխավորությամբ, դիմել է մի շարք միջազգային և եվրոպական կազմակերպությունների՝ Թուրքիայի նախագահ Ռեջեփ Թաիփ Էրդողանի կատարած հայտարարության համար պատժիչ գործողություններ ձեռնարկելու նպատակով: Խոսքը նախագահ Էրդողանի աղմկահարույց հայտարարության մասին է՝ կապված Թուրքիայի «Ժողովուրդների դեմոկրատական» կուսակցության հայ պատգամավոր Կարո Փայլանի՝ թուրքական ԶԼՄ-ներում հրապարակված հարցազրույցների հետ, որի ընթացքում նա հայտնել է մտահոգություն, որ իշխող «Արդարություն և զարգացում» կուսակցությունը պատրաստվում է կազմակերպել մահափորձեր Եվրոպայում ապրող հայտնի հայերի, ալևիների ու Թուրքիայից հեռացածների դեմ (Evrensel, Gazete Duvar):

ԵՀՄՖ-ն իր բողոքն ուղղել է Ինտերպոլին և Եվրոպոլին՝ պահանջելով միջազգային հետախուզում հայտարարել բոլոր այն թուրքական ահաբեկչական կազմակերպությունների և անհատների նկատմամբ, որոնք գործում են Եվրոպայում՝ հատկապես Գերմանիայում, ու ծրագրում են գործողություններ քրիստոնեական համայնքների և, մասնավորապես, հայերի դեմ:

Նամակներ են ուղղվել Եվրախորհրդարանի անդամներին և եվրոպական այն երկրների օրենսդիր ու իրավապահ մարմիններին, որտեղ կան թուրքական համայնքներ. բանակցություններ են վարվում Գերմանիայի, Բելգիայի, Նիդերլանդների, Ֆրանսիայի, Դանիայի, Շվեդիայի, Շվեյցարիայի, Հունաստանի, Բուլղարիայի, Մեծ Բրիտանիայի, Ավստրիայի, ինչպես նաև Սլովակիայի վերոնշյալ կառույցների հետ: Համապատասխան նամակներ են ստացել նաև ԵԱՀԿ գրասենյակը, Հարավ-Արևելյան Եվրոպայի մեդիակազմակերպությունը (SEEMO), Միջազգային մամուլի ինստիտուտը (IPI), ինչպես նաև սլովակական ԶԼՄ-ները:

Նախազգուշական նամակներ են ուղղվել նաև Նիդերլանդներում, Գերմանիայում, Դանիայում, Ավստրիայում, Բելգիայում, Բուլղարիայում, Ֆրանսիայում, Հունաստանում, Շվեդիայում, Շվեյցարիայում, Մեծ Բրիտանիայում և Սլովակիայում գործող թուրք դեսպաններին առ այն, որ պատժիչ գործողություններ կարող են ծավալվել թուրքական ահաբեկչական կազմակերպությունների և նրանց հովանավորողների դեմ հայկական կազմակերպությունների կողմից:

Հայտնում ենք այն մասին, որ վերոնշյալ միջազգային ու եվրոպական կառույցների հետ համագործակցությունը մեկնարկել է, և այս պահին այն ընթանում է հարց ու պատասխանի ձևաչափով: Ընթացքը գնահատվում է շատ դրական, և հետագա զարգացումների հետ կապված կհայտարարենք լրացուցիչ: