Նույն սցենարը՝ քաղաքային զբոսանքը, մարդկանց ձեռնունայն տուն ուղարկելը և «բարի գիշեր»-ը՝ այս անգամ «Ելք»-ի «էկրանավորմամբ»

«Ելք» դաշինքն իր՝ հունվարի 19-ին հրավիրած երթով դեմ գնաց իր սկզբունքներին։ Մինչ այս, փողոց դուրս գալու և փողոցում իշխանության որոշումների դեմ, ու հենց իշխանության դեմ պայքարելու հարցում «Ելք»-ը սկզբունքային էր՝ դուրս չի գա փողոց, քանի որ դա ինքնանպատակ է, քանի որ փողոց դուրս գալով՝ հարցեր չեն լուծում, և ի վերջո, նրանք պնդում էին, որ եթե մարդիկ դուրս են գալիս փողոց, ապա դա զբոսանք չի լինելու, եթե մարդկանց հանում են փողոց, ապա նրանց ձեռնունայն տուն չպետք է ուղարկեն՝ «բարի գիշեր» ասելով։

Թե ինչով է այս երթը տարբերվում սրան նախորդած զբոսանքներից՝ ու «բարի գիշեր»-ներից «Ելք» դաշինքն իր բացատրությունն ունի։ Այդ հարցը «բարի գիշեր»-ից առաջ բարձրացրեց նաև Նիկոլ Փաշինյանը։ Երևի երթի իմաստը նրա համար էլ համոզիչ չթվաց և նա հայտարարեց։

«Ինչո՞ւ մենք քայլեցինք Երևանի փողոցներում․․․ մենք քայլեցինք Երևանի փողոցներով՝ արձանագրելու, որ ՀՀ-ում մեկնարկել է մի փոքրիկ գործընթաց, որով արձանագրվել է որ քաղաքացիների մեծամասնությունը թանկացմանն ասում է՝ ոչ»։

Միայն թանկացմանը «ոչ» ասելու համար, թերևս կարիք չկար մարդկանց զբոսանքի տանել։ Այս ամենը հնչում է մոտովորապես այսպես․

«Ժողովուրդ, եկեք քաղաքի փողոցներով քայլենք, որ գներն իջնեն»։

Բայց կա նաև այլ խնդիր․ երթը միայն թանկացումներին դեմ ու կողմ ձայները չէր ստուգում։

Հայաստանում թանկացումներին կողմ մարդ չկա, սակայն երթը սակավամարդ էր։ Հավանաբար, բոլորն են գիտակցում, որ իրականում թանկացման դեմ պայքարի օրակարգը համոզիչ չէ, և հազիվ թե միայն երթով՝ գներ իջնեն։

Մարդկանց սակավաթիվ լինելը չվիրիպեց նաև «Ելք»-ի անդամ Նիկոլ Փաշինյանի աչքից, և նա հայտարարեց․

«Երթն իր ծավալներով թեև սարսափելի չէ իշխանության համար, բայց մեծ պոտենցյալ է»։

Հիմա այստեղ նաև հարց է առաջանում․ «Ելք»-ը հանել էր ժողովրդին, որպեսզի իշխանությանը ցույց տար, թե ի՞նչ հնարավոր պոտենցիալ ներուժ կարող է դուրս գալ նրա դեմ, և որ իրականում այդ կողմից կարող են հանգիստ լինել, քանի որ «սարսափելի» ոչինչ չկա՞։

Խոստումնալից չէ նաև հաջորդ երթի օրակարգը․ ըստ էության, այն, բացի հերթական երթից, ոչինչ չի էլ խոստանում։ Զուր էր Փաշինյանը փորձում համոզել մարդկանց, թե բազմամարդ երթ կունենան։

«Ուզում եմ ձեզ հավաստիացնել, որ «Ելք» դաշինքը որևէ մի օր անցկացնելու է Հայաստանի պատմության մեջ ամենամարդաշատ երթը»։

Ու քանի որ նա չէր ուզում մարդկանց շատ հիասթափեցնել, ուստի չասաց, որ այդ «որևէ մի օր»-ը հաջորդ երթի օրը չի լինելու, և ոչ էլ դրան հաջորդող երթերի օրերը։

Եվ այս երթն իր նախորդներից տարբերվում էր միայն նրանով, որ այն իր առջև իշխանափոխության խնդիր չէր դրել։ Եվ մեծ հաշվով էլ պարզ չդարձավ, թե «Ելք»-ը մարդկանց փողոց էր հանել, որ ի՞նչ անի։

Մի խոսքով՝ դարձյալ նույն քաղաքային զբոսանքը, մարդկանց ձեռնունայն տուն ուղարկելը և միայն խոստումներով «բարի գիշեր»-ը՝ այս անգամ «Ելք»-ի «էկրանավորմամբ»։

NEWSPRESS.am