«Ելք» դաշինքը որևէ մի օր կանցկացնի ամենամարդաշատ երթը․ Փաշինյանը երթի մասնակիցներին հույս էր տալիս (լուսանկարներ)

«Ելք» դաշինքի՝ ընդդեմ թանկացումների երթը, «Ո՛չ թանկացումներին և հարկային բեռի ավելացմանը» պաստառներով, պայմանավորված ժամին սկիզբ է առել Շառլ Ազնավուրի հրապարակից։

«Ելք» խմբակցության պատգամավոր Էդմոն Մարուքյանը հայտարարեց, որ այս երթով մեկնարկում է թանկացումների դեմ պայքարը։ Նա նշեց, որ թանկացումները նոր Հարկային օրենսգրքի արդյունքն է։

«Ունենք 9 մանդատներ, վստահ ենք, որ կարելի է փոխել ձեր աջակցությամբ, և այդ էներգիան ուղղելու դեպի քաղաքական մեծամասնություն։ Մեր նվազագույն պահանջն է նախկին եկամտահարկի չափին վերադառնալը»,-ասաց նա:

«Ելք» խմբակցության պատգամավոր Արամ Սարգսյանն էլ նշեց, որ իշխանության դեմ պայքարելու միակ միջոցը հանրային պայքարն է: Նա նկատեց, որ իրենց շատ են ասել, որ ընդդիմադիր խմբակցությունը միայն 9 հոգի ունի և շատ բան անել չի կարող և այսօր նպատակն է, որ ապացուցեն, որ իրենց թիկունքում ՀՀ քաղաքացին է:

Հարկ է նկատել, որ երթի սկզբից մի խումբ երիտասարդներ հրում էին ավտոմեքենա, որը խորհրդանշում էր Հայաստանի տնտեսական իրավիճակը:  Բողոքի երթն ընթանում է «հարկային բեռի իջեցում» և «գների իջեցում» վանկարկումներով:

«Նախկինում վարչապետը հայտարարում էր՝ բենզինը թանկացել է, գազով քշեք մեքենաները: Հիմա, որ գազը թանկացել է, այլընտրանք կա ժողովուրդ ջան, բրդեք ձեր մեքենաները»,- ասաց Նիկոլ Փաշինյանը:

Նիկոլ Փաշինյանի խոսքով՝ «Ելքի» նախաձեռնած բողոքի պահանջը հետևյալն է՝ կասեցնել թանկացումները և հարկային օրենսգրքում փոփոխություններ մտցնել:

Նիկոլ Փաշինյանը նկատեց, որ թանկացումների դեմ պայքարի հաջողությունը մեծամասամբ կախված է քաղաքացիներից ու, եթե հանկարծ իրենք պահանջը հստակ չձևակերպեն, ապա թանկացումները կրկնակի ավելանալու են:

Երթի մասնակիցներն անցան Մաշտոցի պողոտայով և երթը ավարտեցին Հյուսիսային պողոտայում: Նիկոլ Փաշինյանը, դիմելով ներկաներին, նշեց, որ «Ելք» դաշինքն այսօր իրականացրել է իր պատմության ամենամարդաշատ և ամենաէներգետիկայով լեցուն երթը:

«Ուզում եմ Ձեզ հավաստիացնել, որ «Ելք» դաշինքը որևէ մի օր անցկացնելու է Հայաստանի պատմության մեջ ամենամարդաշատ երթը»,- ասաց նա։

Իսկ հաջորդ երթը կլինի փետրվարի 5-ին։