Ի՞նչ են մտածում Երևանի թափառական ու գեղեցիկ կատուները (լուսանկարներ)

Գեղեցիկ են Երևանի թափառական կատուները։ Նրանք ապրում են իրենց կյանքով, ապրում են քաղաքում, բայց քաղաքի հոգսերից հեռու։ Նրանք նույնպես իրենց ուտելիքը փնտրում են աղբարկղերի մեջ այնպես, ինչպես մի շարք մարդիկ։ Միգուցե կատուները նույնպես գիտակցում են, որ ապագայում կքանդվի իրենց փողոցի՝ կիսաքանդ շենքը, ու կմնան որբ ու անտուն։ Միգուցե նրանք նույնպես ապրում են այն վախով, որ շուտով բնակարան չեն ունենա, կլինեն փողոցում՝ անտեր ու սոված։

Սկզբում կքանդվեն փողոցի շենքերը, հետո այնտեղից կհեռացնեն աղբարկղերը, կցրվեն տարածքի կատուները ու կսկսեն որոնել կիսաքանդ տների լքված տանիքներ։ Հետո կսկսեն գտնել տարածքի աղբարկղը ու միասին կհավաքվեն այդ աղբարկղի մոտ։ Կգտնեն իրենց հասանելիք ուտելիքը և ուտելուց հետո կքայլեն քաղաքի մարդաշատ ու մռայլ փողոցներում։

Կատուներից մեկն էլ գուցե կգտնի լավ ու բարի աղջնակի, ով կսիրի իրեն, կկերակրի ու միգուցե բախտը ժպտա և նա հայտնվի տաքուկ բնակարանում։ Այնտեղ մի քանի օր մնալուց հետո կսկսի խաղալ մարդկանց հետ, կդադարի գնալ աղբարկղերի մոտ, որ ուտելու բան գտնի։ Հրաժեշտ կտա լքված տանիքներին ու շենքեր քանդող տեխնիկայի ձայնին։

Կսկսի ապրել կանոնակարգված կյանքով։ Ջարդված տանիքից այլևս ջուր չի կաթա իր դեմքին, քամու սուլոցը չի լսի և հրաժեշտ կտա կիսաքանդ շենքի ներսում հայհոյող մուրացկաններին։ Դուրս կգա բակ, կխաղա, կվայելի արևի տաք շողերն ու եղանակի ջերմությունը։ Անտարբեր կանցնի աղբարկղի կողքով, բայց սրտի կսկիծով կնայի դրա մոտ հավաքված կատուներին։

Կգա տուն։ Կանցնեն ամիսներ ու նա ձագուկներ կունենա։ Տան տերերը կսկսեն խաղալ ձագուկների հետ։ Կատուն իրեն արդեն կզգա որպես հասուն կենդանի։ Հետո տան անդամները կսկսեն այս ու այն կողմ բաժանել իր ձագուկներին, տանը կթողնեն միայն մեկ ձագուկի, իսկ իրեն կգցեն պարկի մեջ, կտանեն ու կնետեն մի անմարդաբնակ վայր։

Կատուն պարկից դուրս կգա, կնայի շուրջբոլորը, կգնա ու կգտնի նոր աղբաման, կիսաքանդ տան տանիք։ Կլսի հարբած մուրացկանների հայհոյանքը, աղբարկղում կուտի իր ուտելիքն ու կքնի քամու սուլոցի տակ։ Այդպես կլինի լավ ու հաճելի, քանի որ այլևս չի լինի մարդու ձեռքի տակ։ Նա կլինի սոված, անտուն, բայց ազատ։