Չբացված խաղաքարտերը մնում են Սերժ Սարգսյանի ձեռքին

Մինչ իշխանության հրահանգով «ընդդիմությունն» իշխանության «բոստանն է ջրում»՝ զբաղվելով սոցիալ-տնտեսական խնդիրներով ու ձեռքերը հեռու պահելով գահից, իշխանությունը, հանգիստ ու խաղաղ պայմաններում, «քաղաքականությունը» տրանսֆորմացիայի է ենթարկում՝ վերադասավորումներ կատարելով։

Այս իրավիճակը ձեռք է տալիս երկուսին էլ՝ այն աստիճան, որ չլռելու և չարտահայտվելու գայթակղությանը չդիմացավ նույնիսկ իշխող կուսակցության խոսնակ Շարմազանովը։ Այս առիթով նա ասել է.

«Ինձ ուրախացնում է, որ «Ելքի» մեր գործընկերները բացառում են իշխանափոխության այլ ճանապարհ, բացի ընտրությունների միջոցով․․․ ես դրական եմ գնահատում իշխանության և ընդդիմության բոլոր հարաբերությունները»։

Իշխանությունն ամեն ինչ անում է, որ «Ելքի» շուրջ շփոթեցնող մթնոլորտ ստեղծվի՝ այս կերպ միաժամանակ իր տեսադաշտում պահելով և՛ ընդդիմությանը, և՛ ժողովրդին՝ որպես «հարսանիքում թամաշա անող խամաճիկների»։

Իսկ ինքը՝ իշխանությունը, այս օրերին, խաղարկում էր նախագահի և նախարարների թեկնածուների առաջադրման հետ կապված իր որոշումները և երևի ուրախանում, որ հասարակությունը, շունչը պահած, սպասում էր, թե վերջապես ինչ է ասելու խաղամաճիկ խաղացնողը։

Իշխող կուսակցությունից տեղեկատվական արտահոսքն էլ հենց ուղղված էր նրան, որ այս շփոթմունքն ու ուշադրությունն ավելի մեծանա։ Ու թեև վաղուց ամեն ինչ հայտնի է, սակայն ՀՀԿ-ում բոլորն ընկել են ձևականությունների հետևից ու փորձում են ցույց տալ ու հերթական անգամ համոզել բոլորին, որ ամեն ինչ թելով կպած է այդ ձեռքից։

Այն, որ ՀՀԿ-ի առաջադրած նախագահի թեկնածուն լինելու է նախկին վարչապետ Արմեն Սարգսյանը, ՀՀԿ-ում պաշտոնապես հայտարարվեց ԳՄ նիստի ժամանակ, բայց նույնիսկ ՀՀԿ թամադա հիշեցնող Շարմազանովը չհամարձակվեց թռչել նախագահի գլխից ու անուններ չտվեց՝ հայտարարելով, թե․

«Մեկ գիշեր սպասեք, անսպասելի թեկնածու չի լինելու․․․ վաղը Սերժ Սարգսյանը կհրապարակի նախագահի թեկնածուի անունը»։

Ու հետո, երբ արդեն հայտարարվեց, թե Սարգսյան Արմենն է թեկնածուն, սկսվեց ներկայացման կամ կրկեսի հաջորդ փուլը. պարզվեց, որ նա իբր պատրաստ չէ նախագահ լինելու։ Արմեն Սարգսյանը հայտարարեց.

«Եթե թույլ տաք, ինձ որոշ ժամանակ է պետք վերջնական որոշում ընդունելու համար»։

Սա այն դեպքում, երբ Սարգսյանները վաղուց հանդիպել ու քննարկել են այս հարցը։ Չի բացառվում, որ ձևական այս «չեմուչում»-ի պատճառը լինի այն, որ նախագահն ու նախագահի թեկնածուն իրականում վերջնական համաձայնության չեն եկել, և դեռ կիսելու և բաժանելու բաներ ունեն։

Եվ ուրեմն, գոնե առայժմ, չբացված խաղաքարտերը կրկին մնում են դեռևս գործող նախագահի ձեռքին, ու կծիկները` նրա ձեռքից կախված։

Բայց իրականում այս խեղկատակությունն ու ձևականությունն արդեն հոգնեցնող է, ու իրականում բոլորն արդեն թքած ունեն այս ամենի վրա։ Քանի որ Հայաստանի քաղաքական դաշտը վաղուց վերածվել է կրկեսի, որտեղ խեղկատակների պակաս չկա՝ ո՛չ իշխանական, ո՛չ ընդդիմադիր թևում։

NEWSPRESS.am