Հայաստանի դիվանագիտության «հաղթանակը». Նիգերիան մեզանով հետաքրքրված է

Հայաստանի արտաքին դիվանագիտությունը շարունակում է «նոր հորիզոններ» գրավել: Դեկտեմբերի 18-ին նախագահական նստավայրում իր հավատարմագրերն է հանձնել Նիգերիայի Դաշնային Հանրապետության նորանշանակ արտակարգ և լիազոր դեսպան Իբրահիմ Համզաթը:

Պարզվում է՝ Հայաստանն ու Նիգերիան զարգացնելու են երկկողմ հարաբերությունները փոխադարձ հետաքրքրություն ներկայացնող ոլորտներում:

Դեսպանի պաշտոնական խոսքից հայտնի դարձավ, որ Նիգերիան շահագրգռված է հատկապես տնտեսական ոլորտում Հայաստանի հետ հարաբերությունների խորացմամբ: Նորանշանակ դեսպանը վստահեցրել է նաև, որ ջանք չի խնայի՝ նպաստելու հայ-նիգերիական հարաբերությունների ամրապնդմանը:

Օրվա առաջին կեսին նախագահի հետ հանդիպում, իսկ երկրորդին՝ դեսպանն արդեն Առողջապահության նախարարությունում էր, ուր հանդիպման էր շտապել նախարար Ալթունյանի հետ:

Այստեղ հետաքրքրականն այն է, որ Արևմտյան Աֆրիկայում գտնվող այս պետությանը հետաքրքրում է մեր երկրի առողջապահության համակարգի փորձը, իբրև թե մենք այնքան զարգացած ենք այս ոլորտում, որ մի բան էլ մեզանից են եկել փորձ տանելու:

Այստեղ մի լավ ուռել-փքվել է Ալթունյանն ու ասել, թե մեզ համար հետաքրքիր կլինի մեր ծրագրերը տեղայնացնել Հայաստանից 50 անգամ ավելի բնակչություն ունեցող երկրում: Հավանաբար նախարարը ցանկություն ունի «նոր հորիզոններ գրավել և բազմաթիվ քննադատությունների արժանացած պապիլոմա վիրուսային վարակի դեմ պատվաստումը տանել Նիգերիա՝ մեզանից պակաս զարգացած երկիր:

Իհարկե, հնարավոր չէ հասկանալ, թե դեսպանն ինչքանով է տեղյակ մեր երկրի առողջապահության ոլորտից, բայց, որ մեզ վրա հույս դնել պետք չէ, մեր պարտքը համարեցինք հոդվածի տեսքով հայտնել:

NEWSPRESS.am