Որտե՞ղ էր Ռոբերտ Մելքոնյանը Մարտի մեկի դեպքերի ժամանակ․ Վոլոդյա Պողոսյան

Օրերս Երևանի նախկին փոխոստիկանապետ Ռոբերտ Մելքոնյանը ֆեյսբուքյան իր էջում Եվրոպայի հայկական միությունների ֆորումի նախագահ Աշոտ Գրիգորյանի վերաբերյալ գրառում էր կատարել և, մասնավորապես, նշել էր, որ 90-ականներին մի խավ վերցրել է իր արու զավակներին ու գնացել արտերկիր, բարգավաճել, սակայն փորձում է միջամտել Հայաստանի գործերին, ուղղորդել ու խելք սովորեցնել։

Դժգոհում էր, որ նրանք անհարկի միջամտում են Հայաստանի գործերին՝ դառնալով կամավոր խորհրդականներ։ Մասնավորապես, խոսքն ուղղված է Աշոտ Գրիգորյանին․ նրան մեղադրում է Հայաստանի վերաբերյալ «խորիմաստ» մտքեր արտահայտելու մեջ՝ նրան անվանելով դասալիք։

Միջազգային և անվտանգության հարցերի փորձագետ, ՀՀ նախագահի ազգային անվտանգության գծով նախկին խորհրդատու, Աշոտ Մանուչարյանի օգնական Վլադիմիր Պողոսյանը NEWSPRESS.am-ի հետ զրույցում անդրադարձավ Ռոբերտ Մելքոնյանի գրառմանը` նշելով, որ նման գրառում անելով՝ Երևանի նախկին փոխոստիկանապետը վիրավորում է ոչ միայն Աշոտ Գրիգորյանին, այլ նաև սփյուռքում ապրող հայերին։

«Սփյուռքում ապրելը դեռ չի նշանակում, որ հայրենասեր չենք և հայրենանվեր գործեր չենք անում։ Թող Ռոբերտ Մելքոնյանն ասի, թե ինքը որտե՞ղ է եղել 2008-ի մարտի մեկի դեպքերի ժամանակ, կամ ընդհանրապես, ի՞նչ է արել Հայաստանի համար»,- ասում է նա և հավելում, որ նման վարքագծով վարկաբեկում են Հայաստանը։

Վ․ Պողոսյանը շեշտում է, որ ԵՀՄՖ-ի նախագահ Աշոտ Գրիգորյանը, ապրելով Սլովակիայում, մեծ գործեր է անում ի նպաստ Հայաստանի: Սլովակիան ճանաչել է Հայոց ցեղասպանությունը, ավելին` քրեորեն հետապնդվում է Հայոց ցեղասպանության հերքումը։

Նա գտնում է, որ նման կերպ հարձակվել մարդու վրա, անընդունելի է և սխալ․ «Մենք հասկանում ենք, թե նա ինչու է հարձակվել, ցանկանում են ցույց տալ, թե մենք քեզ լուրջ չենք ընդունում, սակայն վախեցած են՝ տեսնելով, թե Ա․ Գրիգորյանն ինչ գործեր է անում Եվրոպայում, նաև ԱՄՆ-ում։ Մարդկանց փորձ են անում ոչնչացնել»։

Պողոսյանն ավելի քան վստահ է, որ կոռուպցիան Հայաստանին պարզապես խեղդում է, իսկ ինչ վերաբերում է Հայաստանում ապրելուն, նշում է՝ բոլորն էլ վերադառնալու են Հայաստան և հենց իրենք են շահագրգռված, որ երկիրը զարգանա ու բարգավաճի և, ի վերջո, կոռուպցիան վերանա։

Նա նշում է, որ սփյուռքում Ռոբերտ Մելքոնյանի գրառումից հետո մարդիկ կանգնել են ի պաշտպանություն Աշոտ Գրիգորյանի և դժգոհ են, որ Գրիգորյանի նման մարդկանց վրա կարող են քար գցել։

Վ․ Պողոսյանը հիշեցնում է, որ 1992-ին Ներքին գործերի նախարար Վանո Սիրադեղյանի կողմից կազմակերպած խումբն էր կրակել Աշոտ Գրիգորյանի վրա, և այսօր էլ հնարավոր է 24 ժամվա ընթացքում Վանոյին գտնել բերել Հայաստան, որը չի արվում և առաջարկում է, որ նախ ներքին գործերի աշխատողներն իրենց «մեղքերը» մաքրեն, հետո սփյուռքի հայերին վարկաբեկեն։

«Սփյուռքի հայերի մեծ մասը, ինչպես աշխատել է, այնպես էլ աշխատում է։ Հայաստանում այժմ մոտավորապես բնակվում է 1 մլն 600 հազար մարդ, իսկ կոռուպցիան հասնում է սարսափելի չափերի, իսկ Հայաստանն օրեցօր թուլանում է, սակայն պետք է միասին կառուցել այնպիսի երկիր, որ բոլորը վերադառնան Հայաստան, ոչ թե Ռոբերտ Մելքոնյանի նման մարդիկ հարձակվեն սփյուռքահայերի վրա․ առանց սփյուռքի Հայաստանի վիճակը դժվար է լինելու։ Սփյուռքի վրա հարձակումները մեծ վտանգ են պարունակում․ հայերը պետք է միանան, ոչ թե առանձնանան»,- շեշտում է Վոլոդյա Պողոսյանը: