Մխիթարյանը լքեց «Մանչեսթերի» մարզաբազան, Արսեն Վենգերը խոսեց, իսկ Օբամեյանգը սպասում է. Ֆուտբոլային աշխարհը դեռ սպասում է

Ֆուտբոլային աշխարհն ու հայ երկրպագուները հետևում են, թե ի՞նչ զարգացում է ապրում Հենրիխ Մխիթարյանի ու Ալեքսիս Սանչեսի տրանսֆերային փոխանակությունը: Ալեքսիս Սանչեսի տրանսֆերի հետ կապված բոլոր հարցերը լուծված են, և չիլիացին անհամբեր սպասում է, թե ի՞նչ զարգացում է ունենալու հայ ֆուտբոլիստի տրանսֆերը: Արդեն այս գիշեր անգլիական սպորտային պարբերականները սկսեցին գրել տեղեկություններ, որոնք ավելի հավանական դարձրին հայ ֆուտբոլիստի տեղափոխությունը Լոնդոնի «Արսենալ»:

Բրիտանական Mirror պարբերականը գրեց, թե ինչպիսին է լինելու պայմանագիրը: Ըստ բրիտանական պարբերականի՝ կնքվելու է 4 տարվա պայմանագիր, և Մխիթարյանը տարեկան ստանալու է 5 միլիոն ֆունտ աշխատավարձ: Պարբերականը հայտնեց նաև, որ Մխիթարյանը կդառնա «Արսենալի» ամենաբարձր վարձատրվող ֆուտբոլիստը:

«Մանչեսթեր Յունայթեդի» թվիթթերյան միկրոբլոգում երկրպագուները հրապարակել են լուսանկարներ, որտեղ երևում է, թե ինչպես են հայ կիսապաշտպանն ու ֆուտբոլիստի գործակալ Մինո Ռայոլան լքում «Մանչեսթերի» մարզաբազան:

Շատ հետաքրքիր մամուլի ասուլիս է տվել «Արսենալի» գլխավոր մարզիչ Արսեն Վենգերը, ով խոսել է Սանչեսի ու Մխիթարյանի տրանսֆերների մասին:

Արսեն Վենգերն ընդգծել է, որ դեռ Դորտմունդի «Բորուսիայում» մասնակցելու տարիներին նա հավանում էր Մխիթարյանին և ցանկանում է, որ հայ ֆուտբոլիստը խաղա «Արսենալում»: Նա խոսել է նաև Սանչեսի տեղափոխության մասին ու նշել, որ ամեն ինչ հնարավոր է:

Հավելենք նաև, որ «Արսենալի» թվիթթերյան միկրոբլոգում կան արդեն լուսանկարներ, որտեղ Հենրիխ Մխիթարյանն «Արսենալի» մարզաշապիկով է:

Այս ամենի ֆոնին հետաքրքիր տեղեկություններ են տալիս նաև գերմանական սպորտային պարբերականները, որոնք նշում են, որ Մխիթարյանի տրանսֆերի իրականացումից հետո «Արսենալը» կսկսի Օբամեյանգի տեղափոխության աշխատանքները: Նշենք նաև, որ Օբամեյանգն արդեն իր նախնական համաձայնությունը տվել է:

Եվրոպական սպորտային մամուլը գրում է, որ առաջիկա ժամերին այս դրամատիկ տրանսֆերային փոխանակությունը կկայանա, իսկ հայ երկրպագուներն անհամբեր սպասում են, թե երբ պաշտոնապես կհայտարարվի, որ Հենրիխ Մխիթարյանն արդեն «Արսենալի» ֆուտբոլիստ է:

NEWSPRESS.am sport