Համահայկական միասնական կրթահամակարգի հայեցակարգ (լուսանկարներ)

Այսօր մեծ քաղաքականության ասպարեզում շատ վտանգավոր զարգացումներ են գերիշխում. միաբևեռ կառավարման ուղենիշը՝ համաշխարհայնացումը, աղետալի իրավիճակ է ստեղծել բոլոր երկրներում: Հայաստանն էլ է ներքաշված պետականակործան, ազգամերժ, երկրաքանդ այս քաոսի մեջ: Մեզ պարտադրված քառօրյա պատերազմն արթնացրեց հայությանը. բացահայտեց մեր բացթողումները, սխալները և ազգային ներուժը միավորելու, գործարկելու անհրաժեշտությունը գիտակցվեց:

Մի շարք քաղաքական, հասարակական կազմակերպություններ նախաձեռնել են Հայաստանի ու Սփյուռքի հայությանը միավորող համահայկական կառույցի կազմավորման գործընթաց: Այդ կառույցը պայմանականորեն անվանվել է Հայք: Հին տոմարով Նոր տարվա առաջին օրը` 2018 թվականի հունվարի 13-ին, տեղի ունեցավ «Համահայկական կրթադաստիարաչական համակարգի հայեցակարգ»-ի քննարկումը:

Քննարկման մասնակիցներն էին Հայք նախաձեռնության համակարգող խորհրդի անդամներ` Կառլեն Ալեքսանյանը, հայեցակարգի հեղինակ, «Մաշտոց միավորում» ՀԿ նախագահ Նուրիսա Բեժանյանը, Նժդեհյան ցեղակրոն կուսակցության նախագահ Գևորգ Հովսեփյանը և Հայք նախաձեռնության համակիր Վարդան Ասատրյանը: Կառլեն Ալեքսանյանը ներկայացրեց առկա ժամանակաշրջանի խնդիրները, հայության առջև ծառացած մարտահրավերները, համահայկական կրթահամակարգի կայացման անհրաժեշտությունը. «Աշխարհում կազմավորվել է նոր շարժում, որն ուզում է վերափոխել համաշխարհային միաբևեռ կառավարման համակարգը: Տարածաշրջանում սպասվում են էական փոփոխություններ, մենք էլ պետք է պատրաստ լինենք դրանց»:

Բացման խոսքից հետո Նուրիսա Բեժանյանը ներկայացրեց հայեցակարգը. քննարկման մասնակիցները հիմնականում համամիտ էին սկզբունքային և բովանդակային ձևակերպումներին: Առաջարկվեցին լրացումներ: Ն. Բեժանյանն ընդգծեց, որ կրթության առաջին օղակը հայկական ավանդական, բարոյապես առողջ և ուժեղ ընտանիքն է: Գևորգ Հովսեփյանն էլ հավելեց, որ հայկականության, հայապահպահության կռվանը հայ ընտանիքն է, և պետք է աշխատենք պահպանել ու պաշտպանել այս կարևոր օղակը ժամանակակից աշխարհի կեղտոտ մարտահրավերներից: Հայեցակարգի քննարկման ավարտից հետո մասնակիցները որոշեցին հաջորդ հանդիպման ժամանակ քննարկել համահայկական կրթահամակարգի ծրագրային դրույթները: