«Նախագահ ջան, ես լինեմ էլի նախագահ». Ծառուկյանի խնդրանքը

Ամենայն հավանականությամբ, մարտի 2-ին խորհրդարանում տեղի կունենա ՀՀ նախագահի ընտրությունը:

Մեծամասնություն կազմող ՀՀԿ-ն ՀՀ նախագահի թեկնածուի վերաբերյալ քննարկումները կսկսի մեկնարկած շաբաթվա ընթացքում: Նախագահի հավանական թեկնածուների անուններ շատ շրջանառվեցին մամուլում՝ ՍԴ նախագահ Գագիկ Հարությունյան, ԼՂՀ նախկին նախագահ Արկադի Ղուկասյան, նույնիսկ՝ Արթուր Բաղդասարյան:

Շատ է խոսվում այն մասին նաև, որ նախագահի ամենահավանական թեկնածուն ներկայիս ԱԳ նախարար Էդուարդ Նալբանդյանը կարող է լինել, քանի որ, ըստ ՀՀԿ-ի չափանիշների, ՀՀ ապագա նախագահի թեկնածուն պետք է լինի հեղինակավոր անձ, ունենա Սփյուռքում ազդեցություն, լինի անկուսակցական։

Այս բոլոր չափանիշներին ինչ-որ տեղ համապատասխանում է Նալբանդյանն այն առումով, որ դիվանագիտական կորպուսում աշխատելու տարիներին հասցրել է ամուր կապեր ձեռք բերել, հեղինակությունը լուծելի խնդիր է՝ մամուլի միջոցով, նաև անկուսակցական է:

Թեև չափանիշներին չի համապատասխանում, սակայն պաշտոնի համար գլուխ է կոտրում «Ծառուկյան» դաշինքի նախագահ Գագիկ Ծառուկյանը: Այս հարցով նա մի քանի անգամ արդեն հասցրել է լինել Սարգսյանի մոտ՝ «Նախագահ ջան, ես լինեմ էլի նախագահ» խնդրանքով, սակայն Սարգսյանն իրեն հատուկ դիվանագիտական ոճով մերժել է. «Կապրենք, կտեսնենք, Գագի՛կ ջան»:

Հարցը հասել է մինչև ռուսաստանաբնակ Սամվել Կարապետյանին՝ «Կալուգայի Սամոյին», ով տարբեր հարցերում Սարգսյանի մոտ միջնորդել է Գագիկ Ծառուկյանի կաշին փրկելու նվիրական գործում, սակայն այս հարցում Կարապետյանը ևս մերժողական պատասխան է տվել Ծառուկյանին:

Հիշեցնենք, նոր Սահմանադրությամբ ՀՀ նախագահին ընտրելու է ընտրիչների ժողովը, որ կազմված է ԱԺ պատգամավորներից և պատգամավորների թվին հավասար ՏԻՄ ներկայացուցիչներից: Այսինքն՝ եթե Սարգսյանը որոշի, որ ՀՀ հաջորդ նախագահը պետք է լինի, օրինակ, Ծառուկյանը, իշխող ՀՀԿ-ն այդ որոշումը կյանքի կկոչի: Մնաց Նախագահը անսա Ծառուկյանի՝ «Նախագահ ջան, ես լինեմ էլի նախագահ» խնդրանքին:

NEWSPRESS.am