Հանրապետականները կհրաժարվեն կուսակցության անդամակցությունից՝ նախագահի թեկնածու առաջադրվելու համար

ՀՀԿ-ն այս շաբաթ կհրապարակի նախագահի թեկնածուների անուններ։ Այսօր խորհրդարանում լրագրողների հետ զրույցում ասաց ՀՀԿ խմբակցության ղեկավար Վահրամ Բաղդասարյանը, ով առայժմ ձեռնպահ մնաց անուններ տալուց։

«Հիմա որևէ բան իմանալ չեք կարող, քանի որ մենք այդ քննարկումները դեռևս չենք ծավալել: Երբ այս շաբաթ կլինեն քննարկումները, կլինեն անուններ ու դրա մասին մենք տեղյակ  կպահենք»,- ասաց նա:

Նրա խոսքով՝ փետրվարի 28-ից մինչև մարտի 10-ը նախագահի ընտրության ժամանակահատվածն է: Իսկ ընտրություններն էլ, ամենայն հավանականությամբ, տեղի կունենան մարտի 2-ին:

Վահրամ Բաղդասարյանն նշեց նաև, որ ըստ Սահմանադրության՝ նախագահի թեկնածուն պետք է լինի անկուսակցական:

«Ես կգերադասեի, որ ընդհանրապես կուսակցական անձ չլիներ նախագահը, բայց մեր կուսակիցներն էլ կարող են հրաժարվել անդամակցությունից և առաջադրվել»,-նշեց Բաղդասարյանը։