Կոստանյա՛ն, Ձեր դատախազական տարիների կուտակած մեղքն է

Այն, որ երկու երիտասարդ ոստիկանի կյանք խլած ճանապարհատրանսպորտային պատահարն իսկապես սարսափելի դեպք էր և համատարած անպատժելիության հետևանք, անմեկնաբանելի փաստ է:

Շատերն են այսօր խուսում վթարի մասին, դատողություններ, ճիշտ ու սխալ անում, անգամ արձակուրդից հանձնարարականներ տալիս, մի խոսքով՝ տեղից ելնողը խոսում է վթարի մասին, բայց՝ երբեմն անհիմն:
Իր մարգարիտներն է այսօր շարել նաև նախկինում պատահականորեն դատախազ դարձած, այսօր էլ նույն սկզբունքով Ազգային ժողովում հայտնված պատգամավոր Գևորգ Կոստանյանը:

Դեպքի մասին խոսելիս Կոստանյանն ասել է.

«Ինչ վերաբերում է հարցին, որ դա անպատժելիության հետևանք է, չեմ կարող ասել. կդժվարանայի նման հետևություն անել, որովհետև ցանկացած հանցագործություն, երբ կատարվում է, դա դեռ չի նշանակում՝ անպատժելիության հետևանք: Հիմա ես չգիտեմ՝ արդյոք նա առանց վարորդական վկայականի՞ է եղել, արդյոք վարելու իրավունք ունի՞, բայց վկայականը առկա չի եղել: Ճանապարհային երթևեկության խախտում եղել է, թե ոչ՝ ես նյութերին չեմ տիրապետում»:

Պետք է սկսել Կոստանյանին սովորեցնել լռել, երբ ասելու բան չի ունենում: Այս ամբիցիոզ պաշտոնյային շատ խոսելն ու անտեղի արտահայտվելը միշտ էլ անլուրջ ընդունելու ֆոն է ստեղծում: Սկսենք քննարկել Կոստանյանի՝ «դա անպատժելիության հետևանք է, չեմ կարող ասել. կդժվարանայի նման հետևություն անել» արտահայտությունը:

Պարոն Կոստանյանը, հավանաբար, մոռացել է իր դատախազական տարիները, երբ կոնկրետ գործիքակազմ ուներ՝ զսպելու «Ճվճվ Արոյի» որդիների պես անմեղսունակներին, որպեսզի այսօր չբախվեինք երկու երիտասարդի մահվան դեպքին, բայց գոնե գլխիկոր անցնի թեմայի կողքով, գլուխը բարձր ասում է, թե դժվար է ասել սա անպատժելիության մթնոլորտի՞ հետևանք է եղել, թե՞ ոչ:

Այո՛, պարոն Կոստանյա՛ն, սա անպատժելիության մթնոլորտի արդյունք է, և Դուք դատախազական տարիներին այդ հարցում մեծ մեղք եք կուտակել Ձեր ուսերին՝ թողնելով այդ տեսակի աճի համար բարենպաստ միջավայր: Պետք է հետ հայացք նետել և հասկանալ՝ կոնկրետ այս դեպքի օրինակով էլի՞ եք կարծում, որ սա անպատժելիության հետևանք չէ:

NEWSPRESS.am