«Ասում են՝ «Սեֆ Ինթերնեյշնլ»-ը քցել ա, բայց կարող էինք, չէ՞ փոխհատուցում չառաջարկել»․ հաճախորդին «քցելը» պոզով-պոչով չի լինում

«Սեֆ Ինթերնեյշնլ» ունիվերսալ վարկային կազմակերպության տնօրենի ժամանակավոր պաշտոնակատար Արսեն Քուչուկյանը վստահ է, որ Ամանորի գիշերը Վանաձորի մասնաճյուղից կատարված գողությունը ստվեր չի գցի իրենց ընկերության վրա։

«Ինչո՞ւ պետք է մեր վարկանիշն ընկնի, կամ մեզ չվստահեն․ հակառակը՝ վստահությունը կավելանա, քանի որ մենք մարդկանց առաջարկել ենք փոխհատուցում»,-NEWSPRESS․am–ի հետ զրույցում ասաց Արսեն Քուչուկյանը:

Նա այս օրերին փոխարինում է ընկերության տնօրեն Գարեգին Գևորգյանին, ով, Քուչուկյանի խոսքով, հունվարի 7-ին մեկնել է արտերկիր՝ գործուղման։

Նա նշեց, որ տնօրենը, մինչև իր մեկնումը կարգավորել է փոխհատուցման հետ կապված հարցերը, ըստ որի՝ ընկերությունը համաձայնագրեր է կնքում հաճախորդների հետ, որով պարտավորվում է փոխհատուցել գրավի պայմանագրում նշված ոսկու գնահատման գումարը։

Հարկ է նկատել, որ թեև մասնաճյուղի կողոպուտը կազմակերպվել էր հենց նույն մասնաճյուղի կառավարչի կողմից, ով այս պահին ձերբակալված է, սակայն Արսեն Քուչուկյանը այս խնդրին ընդհանրապես չանդրադարձավ։ Ավելին՝ հարցին, թե ինպե՞ս է վերաբերվում նա շրջանառվող այն տեսակետին ու մեկնաբանություններին, թե ընկերությունը «քցել է» իր հաճախորդներին՝ նա պատասխանեց․ «հա՛, ասում են, որ քցել ենք, բայց մեր ինչի՞ն է պետք ոսկին, հակառակը, դա մեզ համար գլխացավանք է։ Եթե ուզում էինք քցել, ինչո՞ւ էինք փախհատուցում առաջարկում»։

Դիտարկմանը, որ որպես փոխհատուցում առաջարկված գումարն էականորեն ցածր է իրենց ոսկու իրական գումարից, և ստացվում է, որ թանկարժեք զարդն ընկերությունը գնում է «լոմի» գնով, ու փաստորեն հաճախորդները տուժում են, Քուչուկյանն արձագանքեց, թե այս պահին իրենք այլ բան չեն էլ կարող առաջարկել։

«Հնարավոր է նաև այդպես է, բայց կարևորը, որ մենք ինչ-որ չափով գումար ենք առաջարկում, բայց կարող էինք, չէ՞ ոչ մի բան չառաջարկել․․․ Հիմա գողոնի մի մասը հայտնաբերվել է, հույս ունենք, որ մյուս մասն էլ կհայտնաբերվի, բայց քանի որ մարդիկ դեռ չգիտեն, թե կոնրետ հայտնաբերված գողոնի մեջ կա՞ իրենց ոսկին, թե՞ ոչ, ուստի համաձայնագիր են ստորագրել, որ պայմանագրով իրենց գրավադրված ոսկու գումարի չափով փոխհատուցում ստանան»,-ասաց նա։

Հարցին, թե համաձայնագրում նշվա՞ծ է արդյոք, որ գողոնի հայտնաբերման դեպքում հաճախորդները կարող են վերադարձնել որպես փոխհատուցում ստացած գումարները, և ստանալ իրենց գրավադրված ոսկին՝ Քուչուկյանը պատասխանեց, որ իրենց ընթացակարգում նման բան կա։ Նա ըստ էության չպատասխանեց հարցին, թե կոնկրետ համաձայնագրում կա՞ նման կետ, թե՞ ոչ։ Տնօրենի ժամանակավոր պաշտոնակատարը հորդորեց իրենց կայքէջում ծանոթանալ հաճախորդների կողմից ստորագրվող համաձայնագրին։

«Կարող եք բացել մեր կայքը և ծանոթանալ, այնտեղ համաձայնագիրը շատ հակիրճ ներկայացված է»։

Կայքէջում այդ համաձայնագիրը գտնել-չգտնելն այս պահին թերևս այդքան էլ էական չէ, քանի որ ակնհայտ է, որ այն չի պարունակում վերոհիշյալ կետը։ Հարկ է նկատել նաև, որ թեև ընկերության ղեկավար կազմը պնդում է, որ իրենք չեն «քցել» իրենց հաճախորդներին, այն տրամաբանությամբ, որ փոխհատուցում են առաջարկում, սակայն փաստ է, որ մարդիկ իրենց թանկարժեք զարդերի դիմաց գրոշներ են ստանում՝ «մի բան պոկելու, և դրանից էլ չընկնելու» հոգեբանությամբ։

Հատկանշական է նաև, որ այս ձեռագիրը սովորաբար հատուկ է բանկային ու վարկային ընկերություններին, և հաճախորդին «քցելն էլ» պոզով-պոչով չի լինում։

Արմինե Մկրտումյան