Հայաստանում ծխախոտի արտադրությունն աճել է, ծխողների թիվը՝ ևս

ՀՀ ազգային վիճակագրական ծառայության հրապարակած տվյալների համաձայն՝ 2017 թվականի հունվար-նոյեմբերին Հայաստանում ծխախոտի արտադրությունը, 2016-ի նույն ժամանակահատվածի համեմատ, աճել է 18,1%-ով: 2016 թվականի 11 ամիսներին Հայաստանում արտադրվել 21 մլն 62,3 հազար հատ սիգարետ, իսկ 2017-ի հունվար-նոյեմբերին՝ 24 մլն 867.5 հազար հատ: Արձանագրված աճի արդյունքում Հայաստանում ծխախոտի արտադրության մասնաբաժինն արդյունաբերության ոլորտում կազմել է 14.7%:

Հիշեցնենք, որ Հայաստանում 16 և բարձր տարիքային խմբերում ծխախոտի օգտագործման տարածվածությունը տղամարդկանց շրջանում կազմում է 50%-ից ավելի, կանանց շրջանում՝ 3-4%. Հայաստանում 16 տարեկանից բարձր տղամարդկանց կեսից ավելին ծխող է:

Նշենք, որ ծխախոտի ծուխը պարունակում է ավելի քան 4200 տեսակի տարբեր նյութեր, որոնցից մոտ 200 վտանգավոր են մարդու օրգանիզմի համար: Դրանցից առավել վտանգավոր են նիկոտինը, ածխածնի օքսիդը, բենզպիրենը, խեժը, մի շարք ծանր մետաղներ, ռադիոակտիվ նյութեր և այլն, որոնք ունեն քաղցկեղածին ազդեցություն մարդու օրգանիզմի վրա: Ծխախոտի ծխի տոքսիկ ազդեցության մոտ 1/3 բաժին է ընկնում նիկոտինին: Նիկոտինն օրգանիզմում վնասազերծվում է լյարդում, երիկամներում, թոքերում, բայց դրա քայքայման արդյունքում առաջացած նյութերն օրգանիզմից հեռանում են ծխելուց 10-15 ժամվա ընթացքում: Ծխախոտը վնաս է հասցնում գրեթե բոլոր օրգաններին և օրգան համակարգերին: Ծխող մարդկանց մոտ ի համեմատ չծխողների, մի քանի անգամ ավելի հաճախ են հանդիպում քաղցկեղային հիվանդությունները: Ծխողների մոտ թոքի քաղցկեղից մահանալու ռիսկը մոտ 22 անգամ ավելի բարձր է, քան չծխող անձանց մոտ: Ծխելը բարձրացնում է նաև շրթունքների, բերանի խոռոչի ըմպանի, կերակրափողի չարորակ նորագոյացությունների առաջացման ռիսկը: Ծխախոտի ծուխն առաջացնում են բերանի, քթի խոռոչի, կոկորդի, շնչափողի, բրոնխների լորձաթաղանթի գրգռում, քրոնիկական բորբոքային պրոցեսների առաջացում, հանգեցնելով քրոնիկական բրոնխիտների, թոքերի էմֆիզեմայի, թոքերի քրոնիկական օբստրուկտիվ հիվանդության, թոքերի չարորակ նորագոյացությունների առաջացման: Սիստեմատիկ ծխողների մոտ զարգանում են սիրտ-անոթային համակարգի բազմաթիվ ախտահարումներ, այն վնասում է նաև մարսողական համակարգին: Թեև փորձում են մեր երկրում ծխախոտի օգտագործման ցածր ցուցանիշներ ներկայացնել, սակայն ծխախոտի արտադրության աճն ավելի խոսուն է, քան ցանկացած այլ ցուցանիշ: