ԵԱՏՄ. Խարդախներն իրենց զգում են՝ ինչպես ձուկը ջրում

2018թ. հունվարի 1-ից թանկացել է սեղմված գազը, դիզվառելիքը և բենզինը. բացատրում են, որ ԵԱՏՄ մաքսային օրենսգիրքը մտել է ուժի մեջ և արդեն գործում են այլ ակցիզային հարկեր և դրույքաչափեր:

Այնպես չէ, որ հանրությունը չէր սպասում թանկացումների. խոսվում էր շուրջ 700 անուն ապրանքների թանկացման մասին, սակայն այդ ապրանքները դեռևս պետք է ներկրել, որ թանկանան, իսկ ի՞նչ է լինում այն ապրանքների հետ, որ արդեն ներկրվել են՝ մինչև դրույքաչափերի և ակցիզային հարկի փոփոխությունները:

Ակնհայտ է, որ սովորական խարդախություն է հատկապես վառելիքի շուկայում, որն, ինչպես գիտենք, ունի մի քանի բևեռ և կարգավորվում է համատեղ համաձայնություններով: Այնպես որ՝ վառելիքի շուկայի թանկացումները ոչ այլ ինչ են, քան հանցավոր համաձայնեցում, իսկ ինչպե՞ս է նայում նման վարքագծին Տնտեսական մրցակցության պաշտպանության պետական հանձնաժողովը:

ՏՄՊՊՀ-ից փոխանցում են ԵԱՏՄ-ից սերտած բանաձևը՝ թանկացումները պայմանավորված են ԵԱՏՄ նոր օրենքների կիրառմամբ, իսկ որ դեռևս, հատկապես վառելիքը, չի հասցրել ներկրվել, որ թանկանա, ՏՄՊՊՀ-ն լռում է:

Եթե ՏՄՊՊՀ-ն իրեն օրենքով սահմանված իրավունքները չի կիրառում, ինչպես միշտ, հույսը մնում է կառավարությունը, որ պետք է քայլեր ձեռնարկի, իսկ կառավարության ղեկավարն էլ արձակուրդում է: Երկիրը մնացել է սպեկուլյանտներին, մանր ժուլիկներին և առևտրական-խաբեբաներին, որոնք էլ թանկացնում են վառելիքը՝ դեռևս առանց հիմնավորման:

Բենզինի շուկայի հիմնական խաղացողները «Ֆլեշն» ու «CPS»-ն են, որոնք և գին են թելադրում:

Համաշխարհային շուկայում վառելիքի գների նվազումից հետո անգամ Հայաստանում գները նվազելու փոխարեն բարձրանում են, իսկ թանկացումների շուրջ խոսակցությունների ֆոնին վառելիքի բիզնեսով զբաղվողների համար իսկական Ամանոր է:

Ի դեպ, Սյունիքի մարզի բնակիչները բողոքում են, որ իրենց թույլ չեն տալիս Իրանից մի քանի լիտր բենզին բերել՝ սեփական կարիքների համար, իսկ սահմանից այս կողմ բենզինը վաճառվում է արդեն աստղաբաշխական գումարներով: Մասնավորի մեկ լիտր իրանական բենզինը հարվածում է «Ֆլեշ»-ին ու «CPS»-ին, իսկ այս պարագայում ի՞նչ տնտեսական զարգացում ունենալու մասին է խոսքը, երբ մոնոպոլիաներն են որոշում ապրանքի գինը:

NEWSPRESS.am