«Որ իջնի, կասեմ, որ հարցրել եք»․ Վանաձորի նախկին քաղաքապետի որդու և Քրիստ Մարուքյանի միջև ծեծկռտուք է եղել

Մամուլում շրջանառվող լուրերի համաձայն՝ երեկ՝ հուվարի 9-ի երեկոյան, Վանաձորում գտնվող «Հացատուն ԳՏԱ» խորտկարանում վիճաբանություն-ծեծկռտուք է տեղի ունեցել։ Նախնական տվյալներով՝ վիճաբանությունը ծագել է Վանաձորի նախկին քաղաքապետ Սամվել Դարբինյանի որդու՝ Արգիշտի Դարբինյանի և «Լուսավոր Հայաստան» կուսակցության անդամ, ԱԺ պատգամավոր Էդմոն Մարուքյանի եղբոր՝ Քրիստ Մարուքյանի միջև։

Թե ի՞նչն է հանդիսացել վեճի պատճառ, NEWSPRESS.am-ը փորձեց պարզել Քրիստ Մարուքյանից, սակայն «բաժանորդն անջատել էր հեռախոսը»։

Նախկին քաղաքապետ Սամվել Դարբինյանի հետ ևս չհաջողվեց կապ հաստատել։ Երկար զանգերից հետո վերջապես լսափողից լսվեց մի տղամարդու ձայն։ Նա ասաց, որ ինքը Սամվել Դարբինյանի վարորդն է, և որ Դարբինյանը թոռ է ունեցել ու «հիմա իր թոռան մոտ է»։

Կողքից հավանաբար ինչ-որ մեկը հուշեց, որ իմանա, թե ով է զանգահարողը (քանի որ լսվում էր՝ հարցրու, հարցրու), որից հետո անմիջապես հնչեց հարցը․

«Բայց ո՞ վ ա զանգում»։

Ասացի, որ լրագրող եմ։

«Ի՞նչ ա եղել, բա՞ն ա պետք փոխանցել իրան»։

Հարցրեցի՝ տեղյա՞կ է ինքն արդյոք երեկվա ծեծկռտուքի մասին․ այս հարցին վարորդն, ըստ էության չպատասխանեց․

«Լավ, որ իջնի, կասեմ, որ հարցրել եք»,-ասաց ու անջատեց հեռախոսը։

Իսկ ավելի ուշ՝ երբ կրկին փորձեցինք կապ հաստատել, հեռախոսն անջատեցին։