Քաղաքացիները բողոքում են՝ մինչ ՍԵՖ-ի տնօրենը Շրի Լանկայում կյանքն է վայելում

Հունվարի 1-ի գիշերը Վանաձոր քաղաքում գործող «ՍԵՖ Ինթերնեյշնլ» ունիվերսալ վարկային կազմակերպության գրասենյակից խոշոր չափի գողություն էր կատարվել: Գողացվել էր մոտ 20 կգ ոսկյա իրեր, 7200 ԱՄՆ դոլար և 8 մլն 300 հազար դրամ։ Ավելի ուշ գործի շրջանակներում կալանքի տակ առնվեց մասնաճյուղի կառավարիչ Հայկազ Մարտիրոսյանը:

Օրերս էլ ընկերությունը հաղորդագրություն տարածեց այն մասին, որ սկսվել է գողացված ոսկյա զարդերի փոխհատուցման գործընթացը, ինչը, սակայն, զարդերի սեփականատերերի սրտով չէ:

Բանն այն է, որ առաջարկվում է հաճախորդներին ստորագրել մի պայմանագիր, որով փոխհատուցումը կկատարվի գրավի պայմանագրում նշված գնահատման թվով, ինչն էական ցածր է այսօրվա շուկայական գնից, բացի այդ, ենթադրենք քաղաքացու զարդն ադամանդակուռ է, իսկ հայտնի է, որ ադամանդը չի գնահատվում և չի ընդունվում, հետևաբար այս պայմանագրով մարդը կորցնում է իր ադամանդը կամ այլ թանկարժեք քարը:

Հետաքրքրական, ինչ-որ տեղ նաև ցավալի է, որ այս լարված օրերին վարկային կազմակերպության տնօրեն Գարեգին Գևորգյանն իր հանգիստն է անցկացնում Շրի Լանկայում և ոչ մի գրամ հանրային պատասխանատվություն չի կրում՝ հանդիպելու տուժած քաղաքացիների հետ և մարդկանց հարցերին սպառիչ պատասխաններ տալու:

Հիշեցնենք, որ հանրային խոսքով հանդես չի եկել նաև «ՍԵՖ Ինթերնեյշնլ» ՍՊԸ-ի հիմնադիր «Վորլդ Վիժն» միջազգային քրիստոնեական բարեգործական կազմակերպության հայկական գրասենյակը, որից ևս պետք էր նման բան ակնկալել: Մի խոսքով՝ բարձիթողի վիճակ ամենուր:

NEWSPRESS.am