Սանկտ Պետերբուրգում տեղի ունեցածն ահաբեկչություն էր․ Վլադիմիր Պուտին

Ռուսաստանի Դաշնության նախագահ Վլադիմիր Պուտինը ահաբեկչություն է որակել դեկտեմբերի 27-ին Սանկտ-Պետերբուրգի «Խաչմերուկ» խանութում տեղի ունեցած պայթյունը։ Այդ մասին հաղորդում է BBC լրատվական գործակալությունը:

Դեպքի օրը ռուսաստանյան լրատվամիջոցները հայտնում էին, որ դա եղել է մահափորձ, այլ ոչ թե պայթյուն, սակայն հետաքննությունը ցույց տվեց, որ դա ամենևին էլ այդպես չէ։

Վլադիմիր Պուտինը Սիրիայում ռազմական գործողություններին մասնակցած զինվորականների պատվին կազմակերպած միջոցառման ժամանակ ասել է, որ Պետերբուրգում տեղի ունեցածն ահաբեկչություն է եղել, բացի այդ, նրա խոսքով, հատուկ ծառայությունները ևս մեկ ահաբեկչություն կանխել են: Դեպքի հետ կապված այլ մանրամասներ Պուտինը չի հայտնել:

Հիշեցնենք, որ չորեքշաբթի օրը Սանկտ Պետերբուրգի «Խաչմերուկ» խանութում պայթյուն էր տեղի ունեցել, ինչի հետևանքով 13 մարդ էր տուժել, իսկ տուժածներից 8-ը տեղափոխվել էին հիվանդանոց: Ենթադրվում է, որ հանցագործը պայթուցիկ սարքը թողել էր պահատուփում:

Նախօրեին ՌԴ քննչական կոմիտեն հայտարարություն էր տարածել, ըստ որի քրեական գործ է հարուցվել «մեկից ավելի անձանց նկատմամբ սպանության փորձ» հոդվածով, սակայն հավելել էին, որ այլ վարկածներն էլ են հետաքննվում: Նոր մանրամասների դեպքում կտրվի լրացուցիչ տեղեկություն։