«Հերի՛ք է էդքան իջնեք»․ «Երկիր Ծիրանին» բնակարանի հարց է բարձրացնում

«Երկիր Ծիրանի» քաղաքական ուժի համար կարծես մի տեսակ սկզբունքի հարց է դարձել ընդդիմանալ իշխանությանը։ Եվ, անկախ այն բանից, թե ինչ հարց է առաջ քաշվում, նրանք անպայման դեմ են։ Այս անգամ էլ «Երկիր Ծիրանի» խմբակցության անդամներն ընդդիմացան, և ազատամարտիկներին բնակարանով ապահովելու հարցին դեմ քվեարկեցին։

Այսօր՝ դեկտեմբերի 26-ի Երևանի քաղաքապետարանի ավագանու նիստում, քննարկման էր դրվել երկու ազատամարտիկների՝ Ապրես Հովհաննիսյանի և Հրանտ Աղաբեկյանի ընտանիքներին բնակարանով ապահովելու հարցը։ Ու թեև մանրամասնորեն ներկայացվեց երկու ընտանիքների սոցիալական վիճակն ու բնակարան ստանալու անհրաժեշտությունը, սակայն «Երկիր Ծիրանի» խմբակցության անդամները նկատեցին, որ Ապրես Հովհաննիսյանը և Հրանտ Աղաբեկյանը «բռնազավթիչ» իշխանությունների «արյունոտ և կեղտոտ» ձեռքերից մեդալ են ստացել ու «հաստատ» հանրապետական են։

Այնուհետև հակասելով իրենք իրենց՝ հայտարարեցին, թե անձին դեմ չեն։

Մարինա Խաչատրյանն ասաց․

«Մենք ոչ թե անձին ենք դեմ, այլ այս ապօրինի ընթացակարգին: Միայն այս նիստին 250 հազար դոլար է տրամադրվել բյուջեից այս մարդկանց բնակարան տրամադրելու համար»։

Սոնա Աղեկյանն էլ, չգիտես ինչու, բոլորին ցույց տվեց կալանավայրում գտնվող ազատամարտիկների տեղը։

Մասնավորապես հիշելով Սամվել Բաբայանի, Ժիրայար Սեֆիլյանի, Պավլիկ Մանուկյանի մասին՝ նա բոլորին կոչ արեց սթափվել․ «Սթափվե՛ք, Երևանի ավագանու անդամներ»: Այս կոչին ի պատասխան՝ «Հանրապետական» խմբակցության անդամ Հովհաննես Ավանեսյանն արձագանքեց՝ «Կեթաս, մարդուդ տենց կասես»։

Նկատենք, որ մինչ այդ խմբակցության անդամները դեմ էին քվեարկել ժողովրդական արտիստներին բնակարանով ապահովելու հարցին։ Նրանք մասնավորապես դեմ են, որ Ռուբեն Մաթևոսյանը բնակարան ստանա քաղաքապետարանի կողմից, և նշում են, որ ավելի լավ է բնակարան տալ ազատամարտիկների ու զինվորների ընտանիքներին։

Նրանց այս դիրքորոշմանն էլ Լևոն Իգիթյանն էր արձագանքել․

«Ցավում եմ, որ հասել ենք այն վիճակին, որ բացարձակ արժեքն էլ ենք կասկածի տակ դնում, էս տեմպերով մենք կնմանվենք մեր կողքի ցեղերին, իսկ ես չեմ ուզում Ադրբեջանին հասնենք։ Զոհված զինծառայողների ընտանիքներին մենք բազմիցս օգնել ենք, այդ մասով ավագանու որոշումներ կան, հերիք է էդքան իջնեք»: