11 մետրանոց, կարմիր քարտ. «Բարսելոնան» խոշոր հաշվով հաղթեց Մադրիդում

Իսպանիայի առաջնության 17-րդ տուրում Մադրիդի «Ռեալը» «Սանտիագո Բերնաբեու» մարզադաշտում հյուրընկալեց կապտանռնագույններին:

Հանդիպման առաջին կեսն ավարտվեց գոլազուրկ ոչ-ոքիով, թեև երկու թիմերն էլ հնարավորություններ ունեին հաշիվը բացելու: Հյուրերի կազմում Պաուլինյուն, Մեսսին, Պիկեն, տանտերերից էլ Ռոնալդուն, Բենզեման ու Մոդրիչը մի քանի անգամ բաց թողեցին մրցակցի դարպասը գրավելու շանսը:

Երկրորդ խաղակեսի մեկնարկին կատալոնցիներն սկսեցին ակտիվություն դրսևորել և 54-րդ րոպեին Լուիս Սուարեսը բացեց խաղի հաշիվը: 10 րոպե անց՝ 64-րդ րոպեին գնդակը երկրորդ անգամ Արքայական ակումբի դարպասում էր: Կարվախալը նախ ձեռքով փորձեց հեռացնել գնդակը դարպասից, ապա և ինքը գրավեց սեփական դարպասը: Մրցավարը որոշեց կարմիր քարտ տալ ֆուտբոլիստին և 11 մետրանոց նշանակել.այն հաջողությամբ իրացրեց Լեո Մեսսին:

Դրանից հետո Ռեալի մարզիչ Զինեդին Զիդանը փոփոխություններ կատարեց՝ 65-րդ րոպեին Բենզենային փոխարինեց Նաչոն, իսկ 72-րդ րոպեին ֆրանսիացին կրկնակի փոխություն կատարեց՝ Կազեմիրո-Ասենսիո, Կովաչիչ-Բեյլ:

Հանդիպման վերջնամասում Մեսսիի փոխանցումից հետո Վիդալը հաշիվը դարձրեց խոշոր՝ 3:0:

Հիշեցնենք, որ անցկացված 17 տուրից հետո «Բարսելոնան» մրցաշարային աղյուսակի առաջատարն է՝ վաստակած 45 միավորով (14 հաղթանակ, 3 ոչ-ոքի, 0 պարտություն), «Ռեալը» 31 միավորով շարունակում է մնալ 4-րդ հորիզոնականում: