«Մենք չենք ուզում «հիվանդ ոչխար»՝ ղեկավարություն, «հիվանդ ոչխարը» մեր ամբողջ հոտը կհիվանդացնի»

Հայ ռազմական գործիչ, Լիբանանի բանակի բրիգադի գեներալ, ՀՀ ՊՆ նախկին պաշտոնյա Նարեկ Աբրահամյանի դիտարկմամբ՝ Հայաստանի ամենահիմնական խնդիրը ժողովրդագրությունն է: Նա NEWSPRESS.am-ի հետ զրույցում խնդրի շուրջ իր մտահոգությունը հայտնեց.

«Եթե այսպես շարունակվի դեմոգրաֆիկ խնդիրը մեր ազգային անվտանգությանը սպառնացող թիվ մեկ վտանգը կդառնա»:

Նա չի փորձում թվարկել ազգային անվտանգության արտաքին խնդիրները, որոնք Հայաստանի պարագայում Ադրբեջանն է, Թուրքիան և հնարավոր է հետագայում էլի երկրներ լինեն, բայց որպեսզի այդ ամենին կարողանանք դիմակայել, ըստ ՊՆ նախկին պաշտոնյայի, մեզ հարկավոր է քանակ, առողջ հասարակություն, առողջ երկիր՝ առանց կոռուպցիայի:

«Ես դրա մեջ եմ տեսնում մեր առաջխաղացումը: Միայն այդ դեպքում կարող ենք արտաքին վտանգներին հեշտ դիմակայել: Բայց այսօր մենք ո՛չ քանակ, ու ո՛չ էլ առողջ հասարակություն ունենք: Մեր թիվը պակասում է Հայաստանի մեջ, իսկ կոռուպցիան՝ գնալով ավելանում»:

Նարեկ Աբրահամյանը վստահեցնում է, որ պատկերը նույնն է նաև սփյուռքում: Նրա խոսքով՝ սփյուռքի կազմակերպությունները կոռուպցիայով վարակված են: Մատնանշելով մասնավորապես Լիբանանի հայ համայնքի ղեկավարներին, նա նշում է, որ վերջիններս կոռուպցիայի մեջ են:

«Մենք պետք եղած ղեկավարությունը չունենք, նրանք իրենց անձնականի համար են աշխատում. Իհարկե ո՛չ բոլորը, բայց հիմանականում կոռուպցիայի մեջ են և դրա համար էլ սփյուռքը նույնպես առողջ չէ այնպես, որ կարողանա Հայաստանին ճիշտ ձևով օգտակար լինի»:

Նարեկ Աբրահամյանը հիշեցնում է, որ սովետական միության ժամանակ սփյուռքահայությունը՝ թուրքերի ջարդից փախած, եղեռնից մազապուրծ եղած սփյուռքն էր, իսկ այսօր հայաստանյան սփյուռքահայությունն է, ինչը նա որակում է շատ տխուր իրավիճակ. Հայաստանից դուրս են գալիս և սփյուռք ստեղծում: Եվ այստեղ է, որ ձևավորվում են կազմակերպություններ, որոնք գեներալի խոսքով, ժողովրդին տանում են՝ ուր ուզում են:

«Նրանք, ովքեր չեն մտնում այդ կազմակերպությունների մեջ՝ հեռանում է հայությունից: Մեր եկեղեցին էլ չի պահում ժողովրդին, ինչպես հարկավոր է՝ ո՛չ հոգևոր, և ո՛չ էլ նյութական տեսանկյունից: Եթե այսպես շարունակվի՝ մաթեմատիկական շատ հստակ հաշվարկներով, մենք որոշ ժամանակ հետո՝ ավելի պակասելով, կես բուռ ազգ կդառնանք»:

Նարեկ Աբրահամյանն առաջարկում է խնդրի լուծման իր տարբերակը: Նրա համոզմամբ՝ ժողովուրդը պետք է գիտակցի իրավիճակի լրջությունը և վիճակը բարելավի՝ կա՛մ ընտրություններով, կա՛մ հեղափոխությամբ: Նրա խոսքով՝ ժողովուրդը պետք է գիտակցի, որ կա խնդիր, որը վերացնել է հարկավոր, ո՛չ թե հեռանա երկրից. արտաքին վտանգներին դիմակայելու համար հարկավոր է երկրի և տնտեսության առողջացում:

«Ես համաձայն չեմ Սահակ Պարթևի (Սահակ Ա Պարթև՝ 10-րդ կաթողիկոս- հեղ.), այն մտքին, թե «մեր հիվանդ ոչխարը առողջ գայլից ավելի լավ է». ո՛չ, մենք չենք ուզում «հիվանդ ոչխար»՝ ղեկավարություն, «հիվանդ ոչխարը» մեր ամբողջ հոտը կհիվանդանցնի ու կոչնչացնի … Մեր ղեկավարությունը պետք է առաքինի ղեկավարություն լինի, որպեսզի գիտակցի, որ ինքն է այս ժողովրդին ստեղծված իրավիճակից դուրս բերողը, և երկիր բերողը՝ ներգաղթն ապահովողը»:

ՊՆ նախկին պաշտոնյան վստահեցնում է՝ կա՛մ պետք է ղեկավարությունն ինքն իրեն փոխի, կա՛մ հարկավոր է նրան փոխել: Թե կոնկրետ որ քաղաքական ուժի հետ պետք է փոխել ղեկավարությանը, նա այս պահին դժավարում է ասել, բայց օրինակ Լիբաբանանում նա ինքը ճանաչում է մարդկանց, ովքեր կարող են հենց տեղում տեր լինել իրավիճակին և հայ բնակչությանը հանել իրավիճակից:

«Իշխանության գնացողը ուզում է պահել այն իր ձեռքի մեջ և իշխանությունը ձեռքից չգցելու համար, ամեն ջանք գործի է դնում: Բայց ամեն տեղ կան մարդիկ, ովքեր կարող են փոխարինել նրանց և ավելի լավ կառավարել երկիրը»:

Նա անդրադարձավ նաև վերջերս ՀՀ նախագահ Սերժ Սարգսյանի՝ կոռուպցիայի դեմ պայքարի մասին հայտարարությունը: Ըստ նրա, եթե նախագահը մինչ այս իմացել է դրա մասին և լռել ու այժմ որոշել է խոսել, ապա միայ հայտարարությունը քիչ է, նա պետք է գործնականում ապացուցի, որ լրջորեն ձեռնամուխ է եղել կոռուպցիայի դեմ պայքարին:

«Եթե նա նման հայտարարություն է անում, նշանակում է ընդունում է, որ կոռուպցիա կա ու պետք է կոռուպցիայի հետևում կանգնած մարդկանց հաշվի կանչի: Այն ժամանակ կերևա, որ գործ է ուզում անել և լջորեն պայքարում է կոռուպցիայի դեմ»:

Հիշատակելով Մեծի Տանն Կիլիկիո Արամ Ա. Կաթողիկոսի ելույթը՝ Հայաստան-Սփյուռք 6-րդ համահայկական համաժողովում, Նարեկ Աբրահամյանը նկատեց, որ այն ժամանակ կաթողիկոսը խոսել էր կոռուպցիայի դեմ պայքարի մասին, բայց նա պետք է իմանա, որ կոռուպցիան նաև կա սփյուռքում և եկեղեցում, ու որ իրենք էլ պետք է մաքրեն իրենց շուրջը՝ կոռուպցիայից:

«Ամեն մարդ նախ և առաջ իր տունը թող մաքրի, որպեսզի դեպի տուն տանող բակը մաքրվի: Չպետք է փորձեն բակը մաքրել, իսկ իր տան մեջ եղած կեղտը թողնել, այդպես չի լինում: Այնպես որ կոռուպցիան ամեն տեղ է: Մենք կոռուպցիոն խնդիրների մեջ ենք, և մենք այսպես միայն անդունդ կգնանք, եթե ղեկավարությունն իրեն չշտկի»:

Զրուցեց՝ Արմինե Մկրտումյանը