Ճակատամարտ Իսպանիայում. «Ռեալ» VS «Բարսելոնա». Կանխատեսումներ

Եթե անկեղծ լինենք, ապա այս տարի ֆուտբոլային աշխարհը հիանում է անգլիական Մանչեսթեր Սիթիի ֆանտաստիկ խաղով և ֆրանսիական ՊՍԺ -ի աստղաբույլով, ովքեր ցուցադրում են փայլուն խաղ: Վերջին 5-6 տարիների համեմատ մի փոքր նվազել է կենտրոնացումը «Ռեալի» ու «Բարսելոնայի» ցուցադրած խաղի նկատմամբ, քանի որ 2 թիմերում իրոք կան լուրջ խնդիրներ: NEWSPRESS.am sport-ը ներկայացնում է «Ռեալ» VS «Բարսելոնա» խաղի կանխատեսումները: Հիշեցնենք, որ հանդիպումը կկայանա շաբաթ օրը՝ ժամը 16:00-ին:

Մադրիդի «Ռեալում» գոլ խփող ֆուտբոլիստներ չկան

Պետք է արձանագրել այն փաստը, որ ամառային տրանսֆերային պատուհանի ժամանակ «Ռեալը» չիրականացրեց լուրջ տրանսֆեր, որն էլ դարձավ այս մրցաշրջանում «Ռեալի» հիմնական խնդիրների պատճառը: Զիդանը չվստահեց ու վաճառեց Ալվարո Մորատային, ով հիմա ֆանտաստիկ մրցելույթներ ունի «Չելսիում»: Մորատան գրավում է մրցակիցների դարպասը, կատարում է գոլային փոխանցումներ: Էդեն Ազարի հետ միասին նա հիմա Չելսիում լավագույնն է: Իսկ «Ռեալում»՝ Բենզեմա…

Զիդանն ատամներով ամուր պահում է Բենզեմային, Զիդանը միշտ խաղալու հնարավորություն է տալիս Բենզեմային, Զիդանը միշտ…

Իսկ Բենզեմա՞ն…. Բենզեման ուղղակի հարվածում է շեղ և վերջ: Ռոնալդուն գոլեր է հեղինակում Չեմպիոնների լիգայում, սակայն Իսպանիայի առաջնությունում նա «լուռ» է: Կարելի է ասել, որ «Ռեալում» լուռ են բոլորը: Սա այն կարևոր խնդիրներից է, որ կանդրադառնա «Բարսելոնայի» հետ դիմակայության վրա: Սակայն պետք է հաշվի առնել, որ Կլասիկոներում լինում է ամեն ինչ: Իսկ «Ռեալում» կան տաղանդավոր երիտասարդներ, ովքեր խաղադաշտում կպայքարեն ամեն ինչի համար: Մնում է միայն, որ Զիդանը վստահի երիտասարդներին:

Նեյմարը «ՊՍԺ»-ում է, իսկ «Բարսելոնայում» խաղում է միայն Լեո Մեսսին.

«Բարսելոնայի» ու Մադրիդի «Ռեալի» երկրպագուներն անհամբեր սպասում են, թե ի՞նչ կլինի Նեյմարի հետ: Խոսակցությունները շարունակվում են այն մասին, որ Նեյմարը տեղափոխվելու է «Ռեալ»: Դա կլինի 21-րդ դարի ամենաաղմկահարույց տրանսֆերներից մեկը, և խեղճ Գոնսալո Հիգուաինը վերջապես մի փոքր շունչ կքաշի: «Բարսելոնայում» խաղում է միայն Մեսիին: Նեյմարի բացակայությունն իր մեծ ու բացասական հետքը թողեց: Սուարեսն ու Բենզեման դարձել են համադասարանցիներ, Դելուֆեուին քիչ են վստահում, Ինիեստան ավելի է ծերացել, իսկ Պաուլինյոն դեռ հարմարվում է իսպանական ֆուտբոլին: Երիտասարդները լավ են հանդես գալիս, սակայն չունեն փորձ: «Բարսելոնան» դեռ պարտություն չի կրել Իսպանիայի առաջնությունում, գլխավորում է մրցաշարային աղյուսակը, սակայն ցուցադրում է ոչ դիտարժան ֆուտբոլ: Պետք է հաշվի առնել, որ «Բարսելոնայի» լավ խաղը պայմանավորված է նաև «Ռեալի» անկման ու «Ատլետիկոյի» մի շարք ֆուտբոլիստների ճամպրուկային տրամադրությունների հետ: Սպասվում է, որ «Բարսելոնայում», ինչպես միշտ, կխաղա Լեո Մեսսին, ով շատ բան կորոշի այդ խաղում:

Ո՞վ կհաղթի իսպանական ճակատամարտում. «Ռեա՞լը», թե՞ «Բարսելոնան»

Հավանականությունը շատ փոքր է, որ լինելու է միապաղաղ ու անհետաքրքիր խաղ, քանի որ այս երկու թիմերն անկախ իրենց կարգավիճակներից, մրցաշարային աղյուսակում զբաղեցրած դիրքից միշտ պայքարի մեջ են: «Ռեալում» ամեն ինչ անփոփոխ է, իսկ «Բարսելոնայում» չկա Նեյմարը: Այս փաստը պետք է որ դուր գա «Ռեալին», քանի որ Նեյմարը կարողանում էր պատժել, կառուցել, հաղթել ու ոչնչից գոլեր ստեղծել: Սակայն պետք է անդրադառնալ այն փաստին, որ «Բարսելոնայի» հաղթանակը կնշանակի բավականին առաջ անցնել չեմպիոնական մրցավազքում, իսկ «Ռեալի» հաղթանակը կնշանակի ուժ ու մոտիվացիա ձեռք բերել: Երկու թիմերում էլ կան լուրջ խնդիրներ, սակայն «Բարսելոնան» այս պահին ավելի ուժեղ է, քան «Ռեալը»: «Բարսելոնան» կարողացավ Չեմպիոնների լիգայում ծնկի բերել հզոր «Յուվենթուսին», իսկ Ռեալն ուղղակի անօգնական էր «Տոտենհեմի» դեմ խաղում: Լինելու է ճակատամարտ, կռիվ ու պայքար, սակայն այդ կռվին ավելի պատրաստ է «Բարսելոնան»: