Աղքատ, բայց ուրախ Ամանոր

Հունվարի 1-ից 800-900 անուն ապրանքի մաքսազերծման դրույքաչափը կբարձրանա, ինչը տեղի է ունենալու՝ ԵՏՄ-ին անդամակցելու արդյունքում։ Թանկանալու է ներկրվող սննդամթերքը՝ թռչնամիսը, կարագը, կաթնային մածուկը, ձուն, ցիտրուսային մրգերը, սուրճը և այլն:

Եթե ԵՏՄ անդամակցության արդյունքում կան թանկացումներ՝ ենթադրվում է, որ պետությունը ևս ինչ-որ քայլեր պետք է ձեռնարկի՝ նման հարվածի ազդեցությունը բնակչության վրա մեղմելու համար: Թեև ժողովուրդը կարագ ու միս գրեթե չի ուտում, սակայն ձու, հավի մաս օգտագործում է, այնպես որ՝ այս հարվածը զգալի է լինելու:

Նշենք, որ 2018-ին որևէ բարձրացում չի նախատեսվում, բացառությամբ գերատեսչությունների տարատեսակ աճերի, իսկ աշխատավարձ, թոշակներ կամ այլ ցուցիչներ, որոնք պետք է օգնեն հանրությանը դիմանալ թանկացումներին՝ պետությունը չի առաջարկում:

Եթե 2017-ին Հանրապետությունում կա շուրջ 1 մլն աղքատ բնակչություն, ապա 2018-ին նրանց քանակը կավելանա, իսկ թե ինչքանով, պարզ կլինի հաջորդ տարի:

Ինչպես գիտենք, Հայաստանում միայն խոսքերով ապրում են, խոսքերով բարգավաճում, խոսքերով սնվում, իսկ ռեալ երաշխիքներ պետությունը չի տալիս:

Իսկ թե երկրի ո՞ր հատվածը 2018-ին կշարունակի սնվել միայն դատարկ ճոռոմաբանությամբ, փչովի խոսքերով կամ դատարկ խոստումներով… երևի թե մի հատված հաստատ արդեն որերորդ անգամ է առնչվել նման դատարկախոսության. պարզապես ինքնասիրության հարց է:

Որքա՞ն է հնարավոր խաբել, ստել և դատարկ խոսքերով կերակրել աղքատներին:

Այս տարի Ամանորին մարդիկ արդեն փող չունեն անգամ տարվա միակ ուրախ տոնը նշելու:

Խանութներում հաստացել են պարտատերերի ցուցակները, կան մարդիկ, ովքեր պարտքով են նշելու կամ վարկեր են վերցրել, որ Նոր տարի նշեն, իսկ թե վաղն ինչ կբերի, եթե չկարողանան վճարել՝ պարզ է. կմեծանա արտագաղթը՝ փող աշխատելու հույսով:

Այնպես որ՝ ԵՏՄ անդամակցությանը Հայաստանը նշելու է թանկացումներով, աղքատությամբ և արտագաղթով:

Ուրախ Ամանոր:

NEWSPRESS.am