Սիգորսությունը՝ պատժելիության և անպատժելիության միջև

Այս տարի Սևանա լճից վերցվեց շուրջ 100 մլն խմ լրացուցիչ ջրաքանակ: Թեև Ջրպետկոմից հավաստիացնում էին, որ այն առանձնապես լճի մակարդակի վրա չի ազդի, սակայն 2016թ. դեկտեմբերի 21-ին 1900,47 մ էր, իսկ այսօր՝ 1900,42 մ: Տարվա կտրվածքով լճի մակարդակը շուրջ կես մետր նվազել է:

Ներկայումս ՀՀ բնապահպանության նախարարության կողմից արգելվել է սիգ ձկնատեսակի և խեցգետնի որսը Սևանա լճում:

Նշենք, որ հենց այս շրջանում է, որ ջրի նման ջերմաստիճանի պայմաններում սիգը գնում է ձվադրման հենց լճի առափնյա հատվածներում, և որսագողերի համար սիգ որսալը դառնում է ավելի հեշտ: Խստացվել է նաև ոստիկանական հսկողությունը. թեև սիգի և խեցգետնի որսի արգելք չկա, սակայն չի թույլատրվում որսալ. արգելքից հետո որսագողերի համար ավելի ծանր պատիժներ են սահմանվում, քան արգելքից առաջ:

Բնապահպանության նախարար Արծվիկ Մինասյանը նշում է, որ այստեղ օրենքը բացթողումներ ունի: Նաև Գեղարքունիքի տարածաշրջանում առկա են սոցիալ-տնտեսական, նաև տարիներ ձևավորված ավանդույթներ, որոնց շրջանցելը դժվար գործ է, այնպես որ՝ սիգի վերջնական արգելքը դեռևս իրական չէ, սակայն փորձում են ձվադրման սեզոնին արգելել որսը, որպեսզի սիգը հնարավորություն ունենա վերարտադրվելու:

Իսկ ինչ վերաբերում է որսագողության դեմ պայքարին, ապա ձկան և խեցգետնի որսի դեմ պայքարի արդյունավետությունը 10 բալանոց սանդղակով գնահատելու դեպքում, Արծվիկ Մինասյանը գնահատում է 7 բալով:

Իսկ թե ինչպես է այս տարի այդ վերարտադրությունը սահուն ընթանալու՝ այլ հարց է, քանի որ Սևանի մակարդակը 5 սմ-ով նախորդ տարվա համեմատությամբ իջել է:

Բացի այդ, ձկան որսի արգելքի շրջանում բոլոր տեսակի լողամիջոցները հանվելու են Սևանից. ոստիկանությունը և տեսչական մարմինն ունենալու են շարժական և անշարժ հսկողության կետեր:
Ինչ վերաբերում է իշխան ձկնատեսակին, ապա այս տեսակը Սևանա լճում գոյատևում է հիմնականում մանրաձկան լցոնումների արդյունքում. լիճ մտնող գետերն աղտոտված են, մեծ է գետերում կենցաղային աղբի տեսակարար կշիռը, բացի այդ, գետերով վեր բարձրանալիս, համայնքներում իշխանը որսում են:

Ինչպես գիտենք, իշխանը ձվադրում է գետի վերին հոսանքներում, այնպես որ՝ այս ձկնատեսակը կամ ընկնում է տեղացիների ցանցը, կամ ՀԷԿ-երի, որոնք կառուցված են Սևան թափվող գետերի վրա, կամ էլ փոքր ժամանակ իշխանը որսում են հենց լճում:

Նշենք նաև, որ լճում պակասել է նաև խեցգետնի քանակությունը. ոմանք կարծում են, որ խեցգետինները հիվանդացել են, այդ իսկ պատճառով խեցգետինների անկում կա:

Հիշեցնենք, որ ՀՀ բնապահպանության նախարարի հրամանով 2017թ. դեկտեմբերի 20-ից մինչև 2018թ. հունվարի 15-ը Սևանա լճում արգելված է ձկան և խեցգետնի որսը:

NEWSPRESS.am