«Սասի Արտակ»-ին քոթակել է պետք

Ազգային ժողովի հանրապետական խմբակցության պատգամավոր Արտակ Սարգսյանին պատկանող «Սաս» սուպերմարկետների ցանցում բացահայտ խաբեություն է:

Մեկ անգամ չէ, որ այս մասին սուպերմարկետի հաճախորդները բարձրաձայնել են, սակայն Սարգսյանը, ով իր խանութների ցանցի պատվին հայտնի է որպես «Սասի Արտակ», շարունակում է նույն ակտիվությամբ ու հավատարիմ իր սկզբունքին խաբել հաճախորդներին՝ ծաղկեցնելով իր բիզնեսը:

Իհարկե նա տեղյակ է, թե ինչ է կատարվում իր սուպերմարկետների ցանցում: Ապրանքի գինը ավելի էժան են գրում, քան այն իրականում ֆիքսված է համակարգչի մեջ: Գնորդը վերցնում է ապրանքը, մոտենում դրամարկղին և այնտեղ պարզվում է, որ այդ ապրանքն ավելի թանկ արժե: Իսկ որոշ դեպքերում, երբ շատ ապրանք ես գնում, չես հասկանում, թե վերջնական հաշվարկի ժամանակ, ինչու է գումարն այդքան մեծ թիվ կազմում:

Երբեմն չկռահելով խաբեությունը, երբեմն էլ՝ ամոթից, վճարում ես համակարգչի վրա ֆիքսված գումարն ու երկու դեպքում էլ հեռանում խաբված:

Սուպերմարկետների աշխատողներն իրենք էլ տեղյակ են վիճակին, սակայն համառորեն լռում են և գլուխները կախ աշխատում: Աշխատողներից մեկը, NEWSPRESS.am-ի հետ զրույցում նկատեց, թե գնային այս խառնաշփոթի մեջ դիտավորություն չկա, և հորդորեց ավելի մեղմ մոտենալ խնդրին:

Սակայն հարկ է նկատել, որ նույն այդ աշխատողները, Հայսատանի բարձր մակարդակի հասնող գործազրկության ֆոնին, պարզապես մտավախություն ունեն համալրել գործազուրկների շարքերը:

Դա «Սասի Արտակի» ձեռագիրն է. մարդկանց իր կողքին պահել և իր համար աշխատացնել սպառնալիքի ազդեցության տակ, և այդ ամենի հետ մնալ անպատիժ:

Մինչդեռ Արտակին կարելի էր քոթակել կամ գոնե դաստիարակչական ապտակ հասցնել դեռ այն ժամանակ, երբ նախընտրական շրջանում հայտնվեցին նրա հետ կապված սպառնալիքների 40 րոպե տևողությամբ ձայնագրությունը: