Մխիթարյան, Նեյմար, Մասկերանո, Սալահ. տրանսֆերների վերաբերյալ 10 «շշուկ»՝ Եվրոպայից

Championat.com-ը ներկայացրել է եվրոպական թոփ-ակումբների տրանսֆերները, որոնք կարող են իրականանալ ձմեռային տրանսֆերային պատուհանի ժամանակ:

NEWSPRESS.am sport-ը ներկայացնում է Դանիլա Իգնատովի հոդվածը թարգմանաբար:

Նեյմար («ՊՍԺ» → «Ռեալ»)

Երբեմն թվում է, թե Նեյմարի հայրն ավելի շատ լուրեր է ստեղծում Նեյմարի անվան շուրջ, քան ինքը՝ ֆուտբոլիստը: Ըստ շշուկների՝ անցյալ շաբաթ նա մեկնել է Իսպանիա և բանակցություններ է վարել Մադրիդի «Ռեալի» ղեկավարության հետ: Դատելով ամենից՝ բրազիլացի հարձակվողը Փարիզում իրեն երջանիկ չի զգում և ցանկանում է Իսպանիա վերադառնալ: 250 միլիոն եվրոյի գործարքը մադրիդցիները դժվար թե իրականացնեն ձմռանը, փոխարենն ամռանը «ՊՍԺ»-ն կարող է զրկվել իր գլխավոր առաջատարից: Դրանով էլ հետաքրքիր է Չեմպիոնների լիգայի 1/8 եզրափակչի խաղը, որտեղ ընդգրկված են Մադրիդի և Փարիզի գլխավոր թիմերը:

Մուհամեդ Սալահ («Լիվերպուլ» → «Ռեալ»)

«Ռեալի» հավանական նորեկներից մեկը, ի թիվս Նեյմարի և Ֆյոդոր Սմոլովի, «Լիվերպուլի» եգիպտացի խաղացող Մուհամեդ Սալահն է: Այժմ Մոն ԱՊԼ-ի լավագույն ռմբարկուն է և Եգիպտոսի հավաքականի առաջատարը, որն Աշխարհի առաջանության խմբային փուլում պայքարելու է Ռուսաստանի ընտրանու դեմ: Եվ առայժմ անհասկանալի է, թե որ թիմի խաղացողի կարգավիճակով է նա ժամանելու Ռուսաստան կես տարի անց:

Էմրե Ջան («Լիվերպուլ» → «Յուվենթուս»)

Եթե Սալահին «Լիվերպուլում» գոնե առայժմ ամեն ինչ բավարարում է , ապա Էմրե Ջանն իր վիճակից դժգոհ է: Գերմանացի կիսապաշտպանը չի ցանկանում նոր պայմանագիր ստորագրել՝ իմանալով «Յուվենթուսի» հետաքրքրությունն իր նկատմամբ: Ջանի խոսքով՝ «սա փողի հարց չէ»: Կես տարի անց նա ձեռք կբերի ազատ ֆուտբոլիստի կարգավիճակ, բայց արդեն հիմա, ըստ խոսակցությունների, նա թուրինյան ակումբի հետ 5 տարվա պայմանագիր է կնքել:

Վիրջիլ վան Դեյք («Սաութհեմփթոն» → «Մանչեսթեր Սիթի»)

Պեպ Գվարդիոլան ԱՊԼ-ում ռեկորդների բավարար շարք չունի և ձմռանը պատրաստվում է ուժեղացնել իր թիմը: Կատալոնցիների կարծիքով՝ «Մանչեսթեր Սիթիին» անհրաժեշտ է նվազագույնը մեկ կենտրոնական պաշտպան: Թեկնածուները երկուսն են՝ Ինիգո Մարտինեսը՝ «Ռեալ Սոսյեդադից» և Վիրջիլ վան Դեյքը՝ «Սաութհեմփթոնից»: Առաջին դեպքում նրա տրանֆերը հնարավոր է իրականացնել ավելի մատչելի գնով: Երկրորդ ֆուտբոլիստի պարագայում շեյխերը պետք է մրցեն «Լվերպուլի» հետ, որը հոլանդացուն ցանկանում էր ձեռք բերել դեռևս ամռանը:

Հենրիխ Մխիթարյան («Մանչեսթեր Յունայթեդ» → «Ինտեր»)

Ժոզե Մոուրինյուն հեշտությամբ կարող է անտեսել իր թիմի ցանկացած ֆուտբոլիստի, եթե նա իրեն դուր չի գալիս: Օրինակ՝ «Չելսիում» այդպես էր Խուան Մատայի դեպքում: «ՄՅՈւ»-ում դա դարձավ Հայաստանի հավաքականի լավագույն ֆուտբոլիստը: Իր մամուլի ասուլիսներից մեկում պորտուգալացին բացեիբաց հայտարարեց, որ Մխիթարյանը կարող է լքել Մանչեսթերը՝ «լավ գնով»: Լրատվամիջոցները ենթադրում են՝ ֆուտբոլիստը երկու տարբերակ ունի՝ «Ինտեր», Սպալետտի կամ վերադարձ «Բորուսիա»:

Ալեքս Սանդրո («Յուվենթուս» → «Մանչեսթեր Յունայթեդ»)

«ՄՅՈւ»-ից հեռացող երկրորդ ֆուտբոլիստը Լյուկ Շոուն է, ով այդպես էլ չկարողացավ վերականգնվել ծանր վնասվածքից: Անգլիացուն փոխարինելու համար Մոուրինյուն ցանկանում է ձեռք բերել Ալեքս Սանդրոյին՝ «Յուվենթուսից»: Բրազիլացին հրաժարվել է պայմանագիրը թուրինցիների հետ երկարաձգելուց, հավանաբար, ցանկանալով Իտալիայից հեռանալ չեմպիոնի կարգավիճակով: Ընդ որում՝ «Մանչեսթեր Յունայթեդը» պատրաստ է պաշտպանի համար վճարել 60 միլիոն եվրո:

Անտուան Գրիզման («Ատլետիկո» → «Բարսելոնա»)

Վերջին շաբաթվա ընթացքում ակտիվացել են խոսակցություններն այն մասին, որ հնարավոր է «Ատլետիկոյի» առաջատարը տեղափոխվի «Բարսա»: Բանն այն է, որ կատալոնյան ակումբի նախագահ Խոսեպ Բարտոմեուն հանդիպել է Գրիզմանի ընտանիքի հետ: Ի դեպ, ֆուտբոլիստի գործերով զբաղվում է նրա քույրը: Ի պատասխան՝ «Ատլետիկոյի» մենեջերները բողոք են ներկայացրել մրցակից ակումբին՝ իբրև թե բանակցությունների կարգավորման կանոնները խախտելու համար: «Բարսայում» ամեն ինչ հերքում են, սակայն գնալով ավելի շատ աղբյուրներ են հայտնում, որ վաղ թե ուշ Գրիզմանը տեղափոխվելու է հենց Կատալոնիայի մայրաքաղաք:

Խավյեր Մասկերանո («Բարսելոնա» → «Հեբեյ Չայնա Ֆորչուն»)

Իսկ ահա արգենտինացի պաշտպանը կորցրել է «Բարսելոնայում» խաղալու ցանկությունը: Պարզապես հոգնել է: Մասկերանոն մերժել է կատալոնցիների՝ նոր պայմանագիր կնքելու բոլոր առաջարկները և որոշել է կտրուկ փոխել իրավիճակը: Լավ է, որ միշտ կա Չինաստանի առաջնությունը, որտեղ ֆուտբոլիստին առաջարկում են եռակի բարձր աշխատավարձ, քան նա ստանում է այժմ: Սպասվում է, որ տրանսֆերն էկզոտիկ անվանումով՝ «Հեբեյ Չայնա Ֆորչուն» ակումբ կձևակերպվի արդեն մոտ օրերս, իսկ «Բարսան» արգենտինացու դիմաց կստանա 6-10 մլն եվրո:

Ահմեդ Մուսա («Լեսթեր» → «Սթոք Սիթի»)

Նիգերիացին հոգնել է 1,5 տարի «Լեսթերի» պահեստայինների նստարանին մնալուց, այնպես որ՝ այս ձմռանը կարելի է տեղափոխության սպասել: ԲԿՄԱ, ի ցավ «բանակայինների» երկրպագուների, Մուսան հազիվ թե վերադառնա, փոխարենը կարող է վարձավճարով «Սթոք Սիթի» տեղափոխվել: Այս թիմին հենց հարձակվող է պետք, որպեսզի օգնի թիմին փրկվել ԱՊԼ-ն լքելուց:

Ալեքսանդր Զինչենկո («Մանչեսթեր Սիթի» → «Նապոլի»)

ՌՖՊԼ-ի ևս մեկ նախկին ֆուտբոլիստ նույնպես նստած է անգլիական ակումբի պահեստային նստարանին և խաղաժամանակ չի ստանում: Զինչենկոն «Ման Սիթիում» ավելի լուրջ մրցակիցներ ունի, քան Մուսան «Լեսթերում»: Իտալիայում խոսվում է այն մասին, որ ուկրաինացի կիսապաշտպանի ծառայություններով հետաքրքրված է «Նապոլին»՝ A Սերիայի ընթացիկ առաջատարներից մեկը: Տրանսֆերին կամ վարձավճարով տեղափոխությանը կարող է խանգարել միայն Պեպ Գվարդիոլայի անձնական ցանկությունը՝ Զինչենկոյին թիմում թողնելու հարցում: