Ինչո՞ւ է Հենրիխ Մխիթարյանը ցանկանում տեղափոխվել հենց «Ինտեր»

Երեկ Corriere dello Sport պարբերականը նշեց, որ «Մանչեսթեր Յունայթեդի» հայ կիսապաշտպան Հենրիխ Մխիթարյանը համաձայնվել է տեղափոխվել իտալական «Ինտեր»։ Իտալական պարբերականները նշում են նաև, որ «Ինտերի» ղեկավարությունն սկսել է բանակցությունները Մխիթարյանի գործակալ Մինո Ռայոլայի հետ։ Իտալական թիմն ամեն ինչ անում է, որ հայ ֆուտբոլիստը ձմռանը համալրի միլանյան թիմի կազմը։

Փաստորեն, սպասվում է այնպես, որ Մխիթարյանի համար մրցավազքում «Ինտերն» առաջ է անցնում «Յուվենթուսից», որը նույնպես ցանկանում է գնել Մխիթարյանին։ Սակայն մեկ բան պետք է հաշվի առնել, որ մրցավազքում «Ինտերի» առավելությունը պայմանավորված է նրանով, որ Մխիթարյանն ինքն է հավանություն տվել «Ինտերին»։ Պարբերականները լռում են ու չեն գրում, թե «Ինտերից» բացի ուրիշ ո՞ր ակումբներն են առաջարկ ներկայացրել «Մանչեսթեր Յունայթեդին»։

Մյուս կողմից պետք է հասկանալ նաև Հենոյին, ով կենտրոնացել է «Ինտերի» առաջարկի վրա, քանի որ միլանյան թիմում փլեյմեյքերի գոտում իրոք կան բացեր։ «Յուվենթուսում» ամեն ինչ կարգին է, քանի որ Կուադրադոն, Պյանիչը, Դիբալան կարողանում են կազմակերպել խաղը կենտրոնում և առջևում, սակայն «Ինտերում» այդ գոտին այդքան էլ ուժեղ չէ։ Այս մրցաշրջանում «Ինտերն» ավելի հաճախ խաղում է 4-2-1-3 սխեմայով, և այդ սխեմայում փլեյմեյքերի պարտականությունները կատարում է Բորխա Վալերոն։ Սակայն նրա բացակայության ժամանակ Լուչիանո Սպալետին կամ տակտիկական սխեման է փոխում, կամ էլ փորձում է այլ տարբերակ գտնել։

Մեծ հաշվով, «Ինտերի» առջևի գծում բոլոր հարցերը լուծում է հարձակվողական եռյակը՝ Պերիսիչ, Իկարդի, Կանդրևա, և այդ դեպքում փլեյմեյքերի գոտին մնում է «անգործ»։ Սպալետին ցանկանում է ունենալ լավ փլեյմեյքեր, ով և՛ գնդակներ կմատակարարի հարձակվողական եռյակին, և՛ կուժեղացնի միջին գծի խաղը: Մխիթարյանը լավ է հասկանում, որ «Յուվենթուսում» մրցակցությունը մեծ է, և իր համար բարդ կլինի մրցակցել Կուադրադոյի, Դիբալայի կամ Պյանիչի հետ, այդ իսկ պատճառով նա առաջին իսկ առաջարկի դեպքում հավանություն տվեց «Ինտերին»։

NEWSPRESS.am sport