Դուռը շրխկացնող Նաղդալյանին պետք էր ձվահարել (տեսանյութ)

Յուրաքանչյուր ժողովրդավար երկրում, եթե բացահայտվեր դեպք, որ ինչ-որ պաշտոնյա մսխել է պետական միջոցները, ապա նա կհայտնվեր ճաղերից այն կողմ: Եթե պաշտոնական դիրքի չարաշահումն էլ մանր թվերի մասին լիներ, ապա առնվազն հասարակության ծանր քննադատության կարժանանար, ներողություն կհայցեր, այնուհետև հանրությունն ինքը կորոշեր՝ պաշտոնյան մնա՞ իր պաշտոնին, թե՞ ոչ:
Նման մի դեպք բացահայտվեց մեր երկրում, երբ մամուլում հրապարակվեց ԱԺ պատգամավոր Հերմինե Նաղդալյանի կողմից բջջային հեռախոսի 2 միլիոն դրամ ծախս անելու մասին հոդվածը:

Հրապարակմանը հաջորդեցից ԱԺ լրատվականի պարզաբանումները, թե թիվն ավելի փոքր է, բջջային օպերատորը մարել է պարտքը: Դրան եկավ պատասխան օպերատորից, թե իրենց համար բոլոր բաժանորդները հավասար են, և Նաղդալյանի պարտքը մարված չէ:

Մի խոսքով՝ «բորշչը» պատրաստ էր, որի հետևանքով հասարակությունն այդպես էլ չհասկացավ, թե ով և ինչպես պետք է այդ վճարումը կատարեր:

Այսօր Հերմինե Նաղդալյանը պատասխանելով հարցին, թե ճի՞շտ են տեղեկությունները, որ ինքն ԱԺ նախագահին պատճառաբանել է, թե սնանկ է և չի կարող վճարել հեռախոսի վարձի գոյացած պարտքը՝ շուրջ 2 մլն դրամ, ասել է.

«Ով նման բան ասում է, դրանցից հարցրեք։ Ես նման բաներ ձեզանից եմ լսում և դրանց ընդամենը մեկ որակում ունեմ ասելու՝ հիմարություն»։

Առանց կանգ առնելու՝ ԱԺ-ի միջանցքում անհարգալից վերաբերմունք ցույց տալով լրագրողների նկատմամբ՝ այդ պատասխանը տվեց Նաղդալյանն ու դուռը շրխկացրեց:

Սա, իհարկե, հասարակության մեղավորությունն է, որ 2 միլիոն մսխած պատգամավորը գլխիկոր չի կանգնում տեսախցիկների առաջ ու չի ասում՝ «կներեք», այլ հակառակը՝ տեսախցիկի առաջ դուռ է փակում, արհամարհում և իր անձի շուրջ համատարած նողկանքը կրկնապատկում:

Գռեհիկ վարքագիծ դրսևորած սույն պատգամավորը պետք է իր արարքի համար հրաժարական ներկայացներ կամ գոնե հոդվածի հրապարակվելուց հետո, իր անունից կատարված վճարման կտրոնը հրապարակեր ու նորից ասեր՝ «կներեք», և կամ էլ առնվազն իր կուսակցության ղեկավարը պետք է ասեր՝ «Սիրուն չի, Հերմինե՛»: Բայց՝ չէ՛: Ինքնավստահ Հերմինեն դուռ է փակում հանրային պատասխանատվության առաջ:

Խնդիրն իրականում մեր հասարակության անհետևողականության մեջ է, որովհետև դուռը ներսից փակող պատգամավորին պետք է դուրս բերել այդ հոյակերտ շենքից ու մի լավ ձվահարել:

NEWSPRESS.am