Այլասերված դատական համակարգում որևէ ձևակերպում չպետք է թողնել դատավորի ճաշակին` ի չարս օգտագործելու. Զոհրաբյան

Հերթական անգամ կառավարությունն իր խոսքի տերը չեղավ: ԱԺ արտահերթ նիստի ժամանակ նկատեց «Ծառուկյան» դաշինք խմբակցության ղեկավար Նաիրա Զոհրաբյանը:

Հիշեցնենք, որ խորհրդարանում քննարկվում է «ՀՀ քրեական դատավարության օրենսգրքում փոփոխություններ և լրացումներ կատարելու մասին» նախագծի փաթեթը:

Դիմելով հիմնական զեկուցող, Արդարադատության նախարարի տեղակալ Արթուր Հովհաննիսյանին՝ Նաիրա Զոհրաբյանը հարցրեց, թե ինչու կառավարությունն այդպես էլ չընդունեց դատական պրոցեսի ընթացքում մեղադրյալի խոստովանության տեսագրման մասին առաջարկը:

Նա նկատեց, որ կառավարությունը խոստացել էր դաշինքի առաջարկը ներառել հաջորդ քննարկմանը, սակայն իր խոսքի տերը չի եղել:

Բացի այդ, Նաիրա Զոհրաբյանը հարցրեց, թե ի՞նչ նկատի ունեն օրենսգրքի կետերից մեկում՝ նշելով, թե անձը կարող է ողջամտորեն ցուցմունք չտալ իր մերձավորի դեմ: Նա փորձեց հստակեցնել Արթուր Հովհաննիսյանից, թե կոնկրետ որ դեպքերն են համարվում ողջամիտ:

«Ողջամտորեն բառը սարքել եք մանտրա, միայն նրան համար, որ կոնկրետ կալանավորի նկատմամբ, կոնկրետ դրդապատճառներից ելնելով՝ ոնց ուզեք, էդ ողջամտորեն բառն օգտագործեք»,-նշեց Զոհրաբյանը:

Պատասխանելով նրան՝ Արթուր Հովհաննիսյանը բերեց կոնկրետ օրինակներ, որոնք «Ծառուկյան» դաշինք խմբակցության պատգամավորին այդքան էլ համոզիչ չթվացին:

«Ցանկացած ձևակերպում պետք է լինի հստակ, որպեսզի մեր բավականաչափ այլասերված դատական համակարգում որևէ ձևակերպում կամ բառ մեկնաբանելու տեղ չթողնի՝ հետագայում այն ի չարս օգտագործելու համար: Ցանկացած գործ կարելի է հարամել և խեղաթյուրել, եթե ձևակերպումները հստակ չեն»,-ընդգծեց Նաիրա Զոհրաբյանը՝ հավելելով, որ մեկնաբանությունները չպետք է թողնել այս կամ այն դատավորի ճաշակին: