Հերթական Նոր տարին՝ ուրիշի բնակարանում, բայց սեփական բնակարանը վերադարձնելու հույսով (տեսանյութ)

«Նորաշեն 2007» սպառողական կոոպերատիվի գործունեությունից տուժած բնակիչներն ամեն տարվա նման, այս տարի էլ Ամանորը կդիմավորեն ուրիշի բնակարանում:

Հիշեցնենք, որ Երևանի Գևորգ Չաուշի փողոցում բազմաբնակարան շենք կառուցելու նպատակով «Նորաշեն 2007» սպառողական կոոպերատիվի ղեկավարությունը դեռևս 2007 թվականին գումարներ էր հավաքել շենքում բնակարան գնելու ցանկություն ունեցող անձանցից: Շատերը վճարել են բնակարանի ամբողջ գումարը:

Հայտնվելով լուծարման եզրին՝ կառուցապատողներն սկսել են բնակարանները գրավադրել և տոկոսով գումարներ վերցնել: Բնակարաններից 14-ը գրավադրվել են ԱԺ փոխնախագահ Հերմինե Նաղդալյանի ու նրա ամուսնու՝ Դավիթ Բեգլարյանի անունով: Մյուս բնակարանները գնել են այլ «տոկոսչիներ»:

NEWSPRESS.am-ի հետ զրույցում բնակիչները նշեցին, որ Նաղդալյանն ու իր ամուսինն այդ բնակարաններից մի քանիսը վերադարձրել են, սակայն դեռևս կան չվերադարձված բնակարաններ: Այս բնակարանների մասով Հերմինե Նաղդալյանը մի առիթով ասել էր, թե իրենց պատկանող բնակարաններից երկուսի համար «լուծման ճանապարհ գոյություն չունի»:

Բնակիչները նկատում են.

«Արդեն բոլորը՝ դատավորը, դատախազը, բոլորն անգիր գիտեն, որ Գագիկ Առաքելյանը, Հերմինե Նաղդալյանը, Ռազմիկ Ավագյանը․․․ մի ամբողջ կազմ վաշխառուներ մեր բնակարանները վերցրել են գրավի տակ, և էս քանի տարի դատավարություն ա գնում, բայց մեր բնակարանները մեզ չեն տալիս»:

Բնակիչներից Արուս Վանյանն էլ նշում է.

«Օլիգարխներն այսօր դղյակներ են կառուցում, իսկ մենք կորցրել ենք մեր բնակարանն, ու իրենք շատ հանգիստ ու սառը նայում են այս անարդարությանը: Իրենք էլ շատ լավ տեղյակ են՝ ինչ է կատարվում: Շարունակում ենք բարոյապես ու ֆինանսապես տուժել, բայց ոչ ոք պատասխան չի տալիս ու մատը մատին չի տալիս»:

Արուս Վանյանը նկատում է, այս Նոր տարին էլ սեփական բնակարանում չեն դիմավորի, բայց գոնե ուզում են հավատալ, որ գոնե եկող տարի սեփական տանիք ունենալու խնդիրը վերջապես կհանգուցալուծվի:

Մանրամասները՝ NEWSPRESS.am-ի տեսանյութում