Ինչպես բյուջեն թալանել մինչև 2040-ը. ՀՀԿ-ի դեղատոմսը

Այն ձեռքը, որը կգնա դեպի պետական բյուջե, պետք է կտրել. հայտարարել է Հանրապետական խմբակցության պատգամավոր Վահրամ Բաղդասարյանը։

Ինչպես գիտենք, արևելյան շատ երկրներում գողերի ձեռքը կտրում են, որ այլևս գողություն չանեն: Այնպես որ՝ Վահրամ Բաղդասարյանը նորություն չի ասել, նորությունն այդ գաղափարախոսության իրականացումն է:

Ինչպես հասկանում ենք նրա խոսքից, նա նկատի ունի ապագա գողերին, իսկ օրենքը հետադարձ ուժ չունի. բյուջեի նախկին և ներկա գողերն արդեն իրենց գործն արել-վերջացրել են:

Այստեղ ի վերջո խնդիրը չի հանգում, թե ինչ է ասել Բաղդասարյանը: Սերժ Սարգսյանի ելույթից առաջ հող է նախապատրաստվում համապատասխան ՀՀԿ-ականների, քաղաքապետերի, ամեն տեսակների կողմից, իսկ ելույթից հետո, ինչ ասում է Սերժ Սարգսյանը, դարձյալ ՀՀԿ-ականների կողմից ստանում է «սահմանադրական վավերացում». բոլորը միաձայն ասում են այն, ինչ ասել է Սերժ Սարգսյանը:

Նա ՀՀԿ-ի ագահության, ընչաքաղցության, փողամալության, բյուջեի օրինական կողոպուտի, երկրի աղքատության մեղքերը նետել է խեղճ ու կրակ համայնքապետերի ուսերին՝ ուժեղի մոտ միշտ էլ թույլն է մեղավոր սկզբունքով: Եվ այժմ ՀՀԿ-ականները հերթով հաստատում են Սարգսյանի թեզերը՝ հուսալով, որ ինչքան շատ մարդ միանա համընդհանուր երգչախմբին, այնքան հանրության մոտ հավատը կամրապնդվի, որ երկրի սխալների, թերացումների, երկրի արտաքին հսկայական պարտքի, կառավարության անճարակության, ֆինանսների կորուստների մեղավորները միմիայն համայնքապետերն են:

Երևի դա էր պատճառը, որ համայնքները խոշորացվեցին: Չի բացառվում, որ վաղը ոչ թե 100 համայնքապետ որսան, այլ՝ 10. բանտերում էլ տեղ կլինի, պատասխան տվողները՝ սահմանափակ:

Իսկ ՀՀԿ-ին պետք է արժանին մատուցել. ակնհայտ է՝ ինչ հաջողվել-չի հաջողվել, սակայն ՀՀԿ-ից միաձայն երգչախումբ ստեղծելը հաջողվել է, և հենց դա է Սերժ Սարգսյանի ձեռքբերումը: Եվ քանի որ ՀՀԿ-ում վերից վար պորտալարով կապված են միմյանց հետ՝ գաղափարախոսության ազդակները պորտալարի միջոցով հասնում է բոլոր ՀՀԿ-ականներին:

Վերադառնանք Վահրամ Բաղդասարյանի դարակազմիկ հայտարարությանը: Եթե, օրինակ, Վահրամ Բաղդասարյանն իրոք հնարավորություն ունենար ՀՀ բյուջե բոլոր գող ձեռքերը բռնելու և կտրելու, ապա ՀՀԿ-ականներն անձեռք ու անոտք էին ման գալու, սակայն Բաղդասարյանն անցյալ ժամանակով չի խոսում, այլ պայմանական, ապառնի, այսինքն՝ մինչև 2040 թվականի մասին է խոսքը:

Բյուջեի միջոցներով վատնված թանկարժեք մեքենաների դիապազոնը, մշտական միջմայրցամաքային ուղևորությունները, կցված գեղեցկուհիները, կցված տգեղ ծանոթուհիները, նրանց ծախսերը, սեփական պալատները, սեփական հաշիվները, նվերները, ի վերջո, բենզենի գումարները: Կարճ ասած՝ մանր-մունր բազմաթիվ ծախսեր ու միայն բյուջեի հաշվին:

Իսկ խոշոր ծախսերից՝ բյուջեից ֆինանսավորվող բնակարանների մեծածավալ շինարարությունը, դպրոցների կառուցումն ու վերանորոգումը, ճանապարհաշինությունը, անբովանդակ խորհրդատվական ծախսերը: Ի դեպ, հաճախ է պատահում, որ որևէ խոշոր բյուջետային կամ վարկային ծրագրի պատասխանատուն որևէ գերտեսչություն է, սակայն իրական դիրիժորը ՀՀԿ-ից է. թերացումների համար պատասխանը տալիս է գերատեսչությունը, փողերը գնում են ՀՀԿ-ականի կամ ՀՀԿ-ականների ազգականների, փեսաների, բաջանաղների կամ էլ բաժակակիցների գրպանները, իսկ ցավը քաշում է գերատեսչությունը:

Ինչևէ: Վահրամ Բաղդասարյանը հեռատես է, նա հաստատ որոշել է միայն 2040 թվականին բռնել բյուջեի գողերին և ձեռքերն անդամահատել, եթե իհարկե այդ տարիներին լինի Վահրամ Բաղդասարյանը կամ որևէ ՀՀԿ-ական: Կարևորն այժմ երգչախմբում կոկորդ պատռելն է, իսկ 2040-ին ՀՀԿ-ն ջրհեղեղ է պատվիրել. ուստի գողանալ մինչև 2040-ը:

NEWSPRESS.am