ՀՀԿ-ն սրբագրում է Նաղդալյանին

ՀՀԿ խմբակցության պատգամավոր, ԱԺ նախկին փոխնախագահ, ՀՀԿ կանանց խորհրդի նախագահ Հերմինե Նաղդալյանը շարունակում է մնալ մամուլի ուշադրության կենտրոնում՝ իր ֆինանսական վայրիվերումներով:

Նախ մամուլում հայտնվեց, որ նա հեռախոսով խոսել է 2 մլն դրամի և չի վճարել: Թեև հետո մամուլում հայտնվեց այն պատգամավորների ցանկը, ովքեր Նաղդալյանից հետ չեն մնում, սակայն Նաղդալյանը դեռևս առաջամարտիկ է:

Այժմ էլ Նաղդալյանի անունը կապվում է տույժ ու տուգանքներ չվճարելու հետ. վերջին երեք տարում Նաղդալյանի մեքենայի տուգանքներն իրենց տույժերով հանդերձ հասել են մի քանի միլիոն դրամի, սակայն Նաղդալյանը չի վճարել:

Դարձյալ գաղտնիք չէ, որ իշխանական ամենատարբեր օղակներին սպասարկող մեքենաները մշտապես խախտում են ճանապարհային երթևեկության կանոնները՝ սկսած քաղաքապետ Տարոն Մարգարյանին սպասարկող մեքենաներից:

Այստեղ խնդիրն այն չէ, որ չի վճարել տույժ ու տուգանքները, այլ այն՝ թե ինչո՞ւ է միայն Նաղդալյանի անունը շրջանառվում: Նաղդալյանն այնքան մեղքեր ունի, որ մի քանի ցմահ ազատազրկվածի բավական է, սակայն անընդհատ նույն մեղեդին լսելը նշանակում է, որ ինչ-որ մեկն է պտտեցնում այդ մեղեդին, նշանակում է՝ ինչ-որ մեկին կամ ինչ-որ «մեկերի» պետք է, որ միայն Նաղդալյանի անունը շրջանառվի:

Իհարկե, վարկաբեկված Նաղդալյանը հետաքրքիր ֆիգուր է, սակայն հաճախ այն, ինչ ցույց են տալիս, ենթադրում է այն, որ փորձում են կոծկել, կամ էլ աթոռակից նետելու համար հիմքեր են հավաքվում:

Չի բացառվում, որ ՀՀԿ-ն սրբագրում է իր անդամներին, և 2018-ին ընդառաջ կուսակցությանը պետք չեն պակաս վարկաբեկված և կոռումպացված անդամներ. այն անդամները, ովքեր հայտնվում են չարաշահումների, կոռուպցիոն և հափշտակության սկանդալների մեջ, կամ առնվազն չեն կարողանում լեզուն ատամների տակ պահել՝ կարող են ոչ ցանկալի ազդեցություն ունենալ 2018-ին:

Ինչպես երևում է, Թունել Հակոբը և Նաղդալյանը շարժվում են ՀՀԿ կառափնարանի ուղղությամբ. ասում են՝ ՀՀԿ-ից ծաղկեպսակ չի լինելու:

NEWSPRESS.am