Աղանդավորական ֆինանսավորումները գալիս են Նյու Յորքից ու Թուրքիայից. պարզաբանում է հոգևորականը

Հայ ժողովրդին դրսից շատ են խանգարում ու չեն թողնում, որ միասնական լինենք, ուժեղ ու հավատով լեցուն: Մենք նոր ուխտի Իսրայելն ենք, ու ամբողջ աշխարհը գիտի, որ հայն ուժեղ է իր հավատով:
Այս մասին NEWSPRESS.am-ի հետ զրույցում նշեց Գյումրու Սուրբ Աստվածածին Մայր եկեղեցու հոգևոր հովիվ Տ. Հովհաննես քահանա Ալեքսանդրյանն ու հավելեց, որ մեր ժողովրդի միասնականության հիմքերի քանդումը գալիս է դրսից:

«16-րդ դարից սկսած մեր թշնամիները սկսեցին քանդել մեր հավատքն, ու դա շարունակվում է նաև այսօր, քանի որ չեն ուզում Առաքելական մնանք: Աղանդավորական խմբակների ու աղանդավորների աճը պայմանավորված է դրսից ֆինանսավորվող կազմակերպությունների գործունեության շնորհիվ, ովքեր այդպես փորձում են պառակտել մեր ազգը»:

Տ.Հովհաննես քահանան ընդգծեց, որ այդ ֆինանսավորումները գալիս են Նյու Յորքից ու մեր հարևան Թուրքիայից, ովքեր փորձում են քանդելով հավատը՝ քանդել նաև հայ ազգին:

«Այդ կազմակերպությունները ցանկանում են մասնատել ազգը, կաթողիկոս դնեն իրենց մարդուն ու գրավեն Հայաստանը: Մեր պետության վերնախավը պետք է այնքան հավատ ունենա, որ վախենա Աստծուց: Մեր վերնախավը պետք է հասկանա, որ այն ինչ անում է, երկնքում Աստված տեսնում է: Դրսից չեն թողնում, որ մենք ազգովի հասնենք այդ հոգեբանությանը: Մենք հզոր ազգ ենք, սակայն հիմա ընթանում ենք հատակով»:

Քահանան հավելեց նաև, որ դեռ 18-րդ դարում տեղի ունեցած ժողովներից մեկի ժամանակ մի անգլիացի ասել է, որ եթե հայ հոգևոր հովիվն իր կրոնը իմանա, ապա ոչ մի փիլիսոփա չի կարող հաղթել նրան:

Տ.Հովհաննես քահանան ընդգծեց նաև, որ պետք է ուժ հավաքենք ու թույլ չտանք, որ դրսից ուղարկված մեծ գումարներով քանդեն մեր հավատքն ու եկեղեցին: