Ռուս սահմանապահները հայերին չեն թողնում մոտենալ Իրանի սահմանին

ՀՀ կառավարության նիստի օրակարգում ներառված էր մի որոշման նախագիծ, ըստ որի, կառավարությունը որոշում է թույլատրել Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեին` դադարեցնել «Մեղրու ՃՇՇՁ» սահմանափակ պատասխանատվությամբ ընկերության հետ 2017 թվականի ապրիլի 21-ին կնքված N ՀՀԷԵԲՊՆՋՏՊԿ-ԲԸՀԱՇՁԲ-17/3-Ա-2 գնման պայմանագիրը:

ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեն այս տարվա ապրիլի 21-ին պայմանագիր էր կնքել «Մեղրու ՃՇՇՁ» ընկերության հետ, որը պետք է վերացներ Սյունիքի մարզում Մ-2 Երևան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում Արաքս գետի ափի շուրջ 40 մ երկարությամբ հատվածի վթարային վիճակը և պետք է վերանորոգումներ կատարեր:

Աշխատանքների կատարման ժամկետ էր սահմանվել մայիսի 21-ը, որից հետո այդ ժամկետը երկարաձգվել էր ևս մեկ ամսով՝ մինչև հունիսի 21-ը։ Այդ ընթացքում վթարային վիճակի վերացման աշխատանքների նախապատրաստական բոլոր փուլերը կատարվել են, սակայն բուն աշխատանքը՝ վթարային վիճակի վերացումը, չի կատարվել:

Պաշտոնական հիմնավորման մեջ ասվում է, որ վերոնշյալ հատվածն Արաքս գետով սահմանակից է Իրանի Իսլամական Հանրապետությանը, և մեր ափամերձ տարածքները հսկվում են ՌԴ-ի 2393 սահմանապահ զորամասի կողմից, ուստի անհրաժեշտ էր ձեռք բերել համաձայնություն կողմերի միջև նշված հատվածում աշխատանքների կատարման և ավարտման համար: Սակայն աշխատանքային կարգով հանդիպումների ընթացքում հնարավոր չի եղել արդյունավետ համագործակցել, և կողմերի միջև համաձայնություն ձեռք չի բերվել: Կոմիտեի կարիքների համար աշխատանքների կատարման անհնարինությունը պայմանավորված է ՌԴ-ի 2393 սահմանապահ զորամասի կողմից համաձայնություն չստանալու հետ»:

Այդ իսկ պատճառով, կառավարությունը որոշել է պայմանագիրը չեղյալ համարել և կողմերին ազատել պատասխանատվությունից և պայմանագրով նախատեսված, սակայն չկատարված աշխատանքների գումարը ետ վերադարձնել ՀՀ պետական բյուջե: