Դատավորը տնավարի ու նորմերի խախտումներով ուժի մեջ թողեց «Նաիրիտի» գործով վճիռը. փաստաբան (տեսանյութ)

ՀՀ արդարադատության նախարարի նախկին տեղակալին թվում էր, թե «Նաիրիտի» նախկին աշխատակիցներն իր ծառայողներն են: NEWSPRESS.am-ի հետ զրույցում իր տեսակետը հայտնեց «Նաիրիտի» նախկին աշխատակիցների ներկայացուցիչ, փաստաբան Տիգրան Սարգսյանը:

Նա նշեց, որ ՀՀ առաջին ատյանի ընդհանուր իրավասության դատարանն, առանց նաիրիտցիների մասնակցության, դատաքննություն է անցկացրել և առանց նրանց ծանուցելու՝ վճռի հրապարակման օր է նշանակել: Փաստաբանը նշեց, որ 18 մասնակցից որևէ մեկը ներկայացված չի եղել, ու թեև այս մասին Վերաքննիչ քրեական դատարանում տեղյակ են պահել, սակայն այստեղ նրանց ներկայացրած փաստերը, մեղմ ասած, հաշվի չեն առել:

«Արդարադատության նախարարի նախկին տեղակալ, դատավոր Արսեն Մկրտչյանը, շատ ագրեսիվ էր տրամադրված, կարծես թշնամիներ լինեինք»,- ասաց Տիգրան Սարգսյանը:

Նրա խոսքով՝ դատավորը խախտել է էթիկայի բոլորն նորմներն ու դատավարության ընթացակարգը:

«Դատավորն իրեն պատկերացնում էր վարչական պաշտոնի անձ ու իրեն թվում էր, թե «Նաիրիտի» աշխատողներն իր ենթակայությամբ աշխատող ծառայողներ են: Մոռացել էր, որ ինքը դատավոր է և կոպիտ ձևով խախտեց սահմանված ընթացակարգերը: Տնավարի ձևով դատավարություն անցկացրեց և օրինական ուժի մեջ թողեց Շենգավիթ վարչական շրջանի ընդհանուր իրավասության դատարանի վճիռը»,-նշեց փաստաբանը:

Նա այս հանգամանքի մեջ փորձում է որսալ դրական կողմը: Ըստ Տիգրան Սարգսյանի՝ այս վճիռն ինչ-որ տեղ նաև իրենց օգտին է:

«Մենք արագ կսպառենք ներպետական իրավունքի պաշտպանության բոլոր միջոցներն ու կգնանք Եվրոպական դատարան, որտեղ հաղթելու շանսերն ավելի շատ են, իսկ Հայաստանում արդարադատության կոպիտ խախտման օրինակ ունենք»,-ընդգծեց փաստաբանը:

Մանրամասները՝ NEWSPRESS.am–ի տեսանյութում.