Իշխանությունը թունելները մաքրելո՞ւ է

Ի՞նչ կարող է և ի՞նչ չի կարող անել իշխանությունը: Իշխանությունը կարող է վարչական ռեսուրսն օգտագործել, կարող է չեղած գործն արածի տեղ ներկայացնել, կարող է հսկայական վարկեր վերցնել, մասամբ՝ գրպանել, կարող է դաս տալ ժողովրդին, թե՝ ապրել ու ծախսել չգիտեք, կարող է ամենաանհայրենասերին հայրենասիրություն քարոզել և էլի նման բաներ:

Իսկ ի՞նչ չի կարող. չի կարող ՀՀԿ-ականներին խելք սովորեցնել, կրթել, դաստիարակել, սովորեցնել քաղաքակիրթ խոսք, շփվելու ունակություն, երկրին ծառայելու անհրաժեշտություն և այլն:

Ժամանակին Գալուստ Գրիգորիչը, երբ հերթական քարն էր գլորում փոսը, հավաքվում էին մեծ ու փոքր ՀՀԿ-ական խելոքներով ու փորձում այդ քարը փոսից հանել: Մինչև քարը շարժվում էր, որ փոսից դուրս գար, Գալուստ Գրիգորիչն է՛լ ավելի մեծ քար էր գլորում փոսը, և այսպես շարունակ:

Կարճ ասած՝ հիվանդությունից հետո Գալուստ Սահակյանին զրկել են կամ զրկվել է որոշակի քարեր գլորելու «պատասխանատվությունից». այդ «փառահեղ» գործը մնացել է Թունել Հակոբին:

Իհարկե, անգամ ՀՀԿ-ականները հասկանում են, որ նա առնվազն պատուհաս է: Այդ է պատճառը, որ խոսվում է նրան ՀՀԿ-ից «ազատ արձակելու» մասին. եթե Գալուստ Գրիգորիչի վրա ծիծաղում էին, ապա Թունել Հակոբն ուղղակի «վառում-թողում» է:

Գաղտնիք չէ, որ նման ծիծաղելի և անտրամաբանական արտահայտվողների պակաս չկա իշխանությունում, սակայն մի մասը գոնե այնքան է խելացի, որ իր տգետ մտքերն ու արտահայտությունները կարողանում է հանրությունից թաքցնել՝ ներկայանալով որպես շատ խելացի մեկը, որ կարող է իր մտքերը չարտահայտել, կամ էլ արտահայտել նեղ շրջանակում, որտեղ անգրագիտությունը սովորական է, անգամ՝ ընդունված:

Իսկ ինչպե՞ս ծնվեցին գալուստսահակյաններն ու թունելհակոբները: Իհարկե, ՀՀԿ-ի շնորհիվ: Երբ փողեր էին ծախսում վերարտադրվելու համար, թունելհակոբների փողերի կարիքը կար, սակայն երբ պետք է խելացի մտքեր արտահայտեն, մարդ չունեն, իսկ ում էլ ունի ՀՀԿ-ն, վարկաբեկված է սեփական ստախոսությամբ, պոռոտախոսությամբ:

Իհարկե, չի բացառվում, որ ՀՀԿ-ն ժեստ անի, որ ազատվում է անբարեկարգ Թունելից՝ նման կատարյալ մտքեր արտահայտելու համար, սակայն եթե թունելհակոբյան վարակը տարածվի ՀՀԿ-ում, ապա դա կլինի վերջի սկիզբը:

NEWSPRESS.am