Հենրիխ Մխիթարյանը կտեղափոխվի «Ինտեր», եթե….

Օրեր առաջ անգլիական ու իտալական սպորտային պարբերականները սկսեցին հոդվածներ հրապարակել այն մասին, որ «Ինտերն» ու «Մանչեսթեր Յունայթեդը» հունվարին պատրաստվում են փոխանակվել ֆուտբոլիստներով:

Corriere dello Sport-ը հաղորդում է, որ անգլիական ակումբը ցանկանում է իր կազմում տեսնել «Ինտերի» կիսապաշտպան Ժոաու Մարիուին և նրա դիմաց պատրաստվում է տալ իր թիմի կիսապաշտպան Խուան Մատային: Իտալական թիմն էլ Մատայի փոխարեն ցանկանում է իր թիմում տեսնել Հենրիխ Մխիթարյանին:

Արդեն հիմա հստակ երևում է, որ «Մանչեսթերում» ցանկանում են Մխիթարյանին տեսնել այլ թիմում: Այդ մասին խոսում են անգլիական սպորտային պարբերականներն ու ու նախկին անվանի ֆուտբոլիստներ: Մասնավորապես, «Լիվերպուլի» լեգենդար ֆուտբոլիստ Սթիվեն Ջերարդը նշել է, որ Ժոզե Մոուրինյոն կարող է դաժան գտնվել իր ֆուտբոլիստների նկատմամբ:

Այդ կերպ անգլիացին ակնարկել է, որ Մխիթարյանի համար հիմա շատ դժվար կլինի նորից վերադառնալ թիմի առաջին կազմ, քանի որ անկայուն խաղերից ու Լինգարդի արդյունավետ հանդիպումներից հետո Ժոզեն հազիվ թե ցանկանա թիմում տեսնել Մխիթարյանին:

Պատահական չէ նաև այն, որ Մխիթարյանին իր թիմում ցանկանում է տեսնել Լուչիանո Սպալետին, քանի որ 2011 թվականին, երբ Մխիթարյանը «Շախտյորում» էր, այդ ժամանակ Սպալետին «Զենիթի» գլխավոր մարզիչն էր և հետևում էր հայ կիսապաշտպանի մրցելույթներին:

Մասնագետները նշում են, որ իտալական թիմը լավ տարբերակ է Մխիթարյանի համար, բայց մյուս կողմից նաև հայտնում են իրենց մտավախությունն այն մասին, որ Մխիթարյանի համար դժվար կլինի հարմարվել իտալական ֆուտբոլին:

Պետք է ընդգծել նաև, որ ֆուտբոլի պատմության մեջ շատ ֆուտբոլիստներ են եղել, որ իսպանական ու անգլիական ֆուտբոլից հետո տեղափոխվել են Իտալիա ու ձախողվել: Այդ տեսանկյունից իտալական ֆուտբոլը նման է գերմանական ֆուտբոլին, բայց մյուս կողմից՝ պետք է նշել նաև, որ Մխիթարյանը Դորտմունդի «Բորուսիայում» կարողանում էր խաղալ իր ֆուտբոլը, ու պատահական չէ, որ նա դարձավ նաև Գերմանիայի Բունդեսլիգայի 2015/2016 թթ. մրցաշարջանի տարվա լավագույն ֆուտբոլիստ:

Մխիթարյանը մարզվում է անհատական ծրագրով, Ժոզեն թիմի կազմից դուրս է թողնում հայ կիսապաշտպանին, իսկ «Մանչեսթերն» ու «Ինտերը» շարունակում են իրենց բանակցությունները:

Ձմեռային տրանսֆերային պատուհանը թեժ է լինելու:

NEWSPRESS.am