ՀՀԿ օրգանիզմը լցվել է իմպլանտներով. ուղեղի փոխարեն սիլիկոն

ՀՀԿ օրգանիզմի անդամներն այլևս իրենց չեն արդարացնում, և իշխող Հանրապետական կուսակցությունը վաղուց արդեն վիրահատության կարիք ունի: Նման մի վիրահատություն իրականացվեց խորհրդարանական ընտրություններից առաջ. որոշ անդամներ՝ կույրաղիքի նման ընդհանրապես հեռացվեցին օրգանիզմից, իսկ որոշներն էլ փոխարինվեցին իմպլանտներով:

Բայց քանի որ այս օրգանիզմն արդեն ճաքեր է տվել և լցված է արհեստականությամբ ու շարքից դուրս եկած օրգաններով, ուստի զարմանալի չէ, որ այդ օրգանիզմի անդամներն աչքի են ընկնում ոչ ադեկվատ պահվածքով ու անհեթեթ հայտարարություններով:

Ի՞նչ է նշանակում այն, որ ո՛չ ավել, ո՛չ պակաս ԱԺ Սոցիալական հարցերի հանձնաժողովի նախագահը, ով կոչված է ժողովրդի սոցիալական խնդիրները լուծելու, սոցիալական անհավասարությունը վերացնելու և, ի վերջո, մարդկանց սոցիալական ապահովության հարցերով զբաղվելու առաքելությանը, հայտարարում է, թե «աղքատին թանկացումը չի վնասի, քանի որ այսպես թե այնպես նա միս ու կարագ չի ուտում»:

Ու իբր դա քիչ էր, որ նա իր «կարագն ու միսը կերավ ու մարսեց», Խոսրով Հարությունյանն էլ դեսերտն է ապահովել, թե «կարտոֆիլ ուտող ընտանիքին ի՞նչ, թե միսը թանկացավ, միևնույն է, նա գումար չունի միս գնելու և շարունակելու է կարտոֆիլ ուտել»:

Անկեղծ ասած՝ սրա առաջին արձանգանքը բոլորի մոտ հետևյալն էր՝ «աննորմալ են էս մարդիկ»:

Իսկապես, նորմալ ու ադեկվատ մարդն իրեն թույլ չէր տա նախ՝ հասարակությանը բաժանել հարուստների ու աղքատների, հետո՝ այդ ո՞վ ասաց, որ աղքատները չեն սիրում կամ չեն ուզում միս ու կարագ ուտել, և ի վերջո այն, որ այսօր աղքատը փող չունի միս ու կարագ գնելու, դրա պատճառները տևական թանկացումներն են, որոնք իրականացվել են հենց միս ու կարագ ուտող ու տռզող իշխանության թեթև ձեռքով:

Այս պարագայում երկուսից մեկը. կամ այս անդամները հանրապետականների շարքերում իրենց երևակայում են ամենազոր ու կարծում են, որ իրենց ամեն ինչ կարելի է, քանի որ ներվում է, և կամ էլ վիրահատության ժամանակ այս անդամների ուղեղները փոխարինվել են սիլիկոնով, ու նրանց մոտ մտածելու կարողությունն իսպառ վերացել է:

Թեև կա նաև մեկ այլ՝ լրացուցիչ տարբերակ ևս. նրանք պարզապես ՀՀԿ օրգանիզմի ստորին հատվածում հոժարակամ զբաղեցրել են իրենց հայտարարություններին ու գործողություններին համահունչ օրգանի ֆունկցիան՝ մոռանալով սակայն, որ այդ հոդվածով դատապարտվողներին բումերանգի նման վերադարձվում են իրենց իսկ արարքները:

Ա.Մ.