Գյուղացիներին պարտքը զիջում ենք, բայց հետո ներում չի լինելու. կառավարությունը մի ձեռքով տալիս է, մյուսով՝ վերցնում

Այսօվա նիստում կառավարությունը որոշեց զիջել 2011-2016 թվականներին պետական աջակցությամբ սերմացու գնած, բայց բնական աղետների պատճառով սերմերի գումարը չվճարած գյուղացիների պարտքը:

Վարչապետ Կարեն Կարապետյանը նկատեց. «զիջում ենք, բայց այսուհետ մաքուր էջից են սկսելու և ներում չի լինելու, քանի որ սերմերի ոլորտը չի ֆինանսավորվելու և պետությունը փորձելու է զարկ է տալ տեղական սերմարտադրությանը»:

Փոխարենը կառավարությունը զրկեց գյուղացիներին մատչելի գնով դիզվառելիքի սուբսիդավորմումից:

Նիստից հետո լրագրողների հետ զրույցում Գյուղատնտեսության նախարար Իգնատի Առաքելյանը նշեց, որ այս տարի աշնանացան սերմը չի սուբսիդավորվել կառավարության կողմից, պարզապես տեղական արտադրողը մատչելի գնով է այն հատկացրել գյուղացիներին:

«Այս տարվանից սերմնացուն գյուղացիներին տրամադրվում է վճարման դիմաց: Այսինքն՝ գյուղացին նախօրոք պետք է վճարի, որպեսզի օգտվի մատչելի սերմնացուից»,-մանրամասնեց գյուղնախարարը:

Նա մտավախություն չունի, որ հողագործների գումար չունենալու պատճառվ կարող են կրճատվել սպառման ծավալները, չնայած այն բանին, որ դիզվառելիքի պահանջարկի առումով արդեն իսկ 30 տոկոսի չափով նվազեցում է եղել: Սա այն դեպքում, երբ դեռ դիզվառելիքը սուբսիդավորվում էր պետության կողմից:

Այլ կերպ ասած, կառավարությունը մի կողմից գյուղատնտեսությանը զարկ տալու իմիտացիա է ստեղծում, մյուս կողմից՝ ավելի խոչընդոտում գյուղացիների գործունեությունը: Կամ ինչպես ասում են՝ մի ձեռքով տալիս է, մյուսով՝ վերցնում: