Ապագայում ոչ մի գյումրեցի փողոցում չքայլի արցունքն աչքերին. գյումրեցի Արմինե տատի երազանքը (լուսանկարներ)

Այսօր՝ դեկտեմբերի 7-ին, Գյումրին կրկին սգում է 1988-ի ողբերգական երկրաշարժի զոհերի համար: Առավոտյան ժամը 10:00-ին քաղաքի «Յոթ վերք» եկեղեցում պագարատ էր, որը մատուցվեց զոհվածների հիշատակին: Պատարագը մատուցեց Տեր Շիրակ ավագ քահանա (Գևորգ) Առաքելյանը:

Պատարագից անմիջապես հետո տեղում հավաքվածները գնացին Սուրբ Ամենափրկիչ եկեղեցու բակում գտնվող հուշակոթողի մոտ, որտեղ պսակներ տեղադրեցին:

Քաղաքի որոշ հոգևորականներ ու գյումրեցիներ այցելեցին նաև գերեզմանոց՝ երկրաշարժի զոհերի շիրիմներն:

Երկրաշարժի ժամանակ չորս հարազատ կորցրած Արմինե տատին հանդիպում ենք Գյումրու փողոցներում: Թեև խուսափում է լուսանկարվելուց, բայց նշում է՝ երկրաշարժից շուրջ 30 տարի անց էլ գյումրեցու վերքերը դեռ չեն սպիացել:

«Ամեն անգամ քաղաքով քայլելիս ու երկրաշարժի հետևանքով վնասված ու փլուզված շենքերը տեսնելիս՝ առանց արցունքների չենք կարողանում նայել»,- NEWSPRESS.am-ի հետ զրույցում ասում է Արմինե տատը:

Նա շարունակում է ապրել Գյումրիում: Թեև հարազատներին կորցրել է հենց այստեղ, հենց այդ ողբերգության ժամանակ, այնուամենայնիվ, ուժ է գտել իր մեջ՝ հարազատ քաղաքը չլքելու:

Արմինե տատը մի մեծ, շատ մեծ երազանք ունի՝ տեսնել Գյումրին կանգնուն ու վերանորոգված: Ոչ մի գյումրեցի ապագայում փողոցում չքայլի արցունքն աչքերին…