Եզակի առանձնյակների հայհոյախառն տիրույթում ես անելիք չունեմ. Արփինե Հովհաննիսյան

Այսօր՝ դեկտեմբերի 7-ին, Ազգային ժողովի քառօրյայի նիստի մեկնարկին ԱԺ նախագահ Արա Բաբլոյանի առաջարկով, Սպիտակի ավերիչ երկրաշարժի 29-րդ տարելիցի առիթով պատգամավորները, մեկ րոպե լռությամբ, հարգեցին 1988 թվականի զոհերի հիշատակը:

Այնուհետև ԱԺ նախագահը ներկայացրեց «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագծի հարակից զեկուցող Արփինե Հովհաննիսյանին: Արա Բաբլոյանը նրան ներկայացնելիս՝ շփոթվեց, սկզբում անվանելով նրան ԱԺ նախագահ, ապա անմիջապես ուղղեց իրեն:

Արփինե Հովհաննիսյանն իր զեկույցում նշեց, որ այս օրենքը չի խաթարելու ընտանիքների անդորրը:

«Մեր դասական ընտանիքների հետ այս օրինագիծն անելիք չունի: Որևէ պարագայում նպատակ չի ունեցել մտնել մարդկանց ընտանիքներ: Ոչ մի օրենք չի կարող մտնել մարդկանց ընտանիքներ: Այս օրենքին մի վերապահեք այնպիսի դեր, որն ի սկզբանե բաժանարար գծեր ու ջրբաժաններ է տանում, չկա էստեղ մեր և ձեր տեսակետ»,- ասաց Արփինե Հովհաննիսյանը՝ հավելելով, որ այստեղ չկան նաև մայրիշխանության կամ հայրիշխանության պայքար և այլ խնդիրներ:

«Ինչ վերաբերում է եզակի առանձնյակների հայհոյախառն, հայհոյական մշակույթն ի ցույց դնողներին՝ նրանց պատասխանն այլ տիրույթում է, և ես այդ տիրույթում անելիք չունեմ»,- ասաց ԱԺ փոխխոսնակը՝ կոչ անելով քվեարկել օրինագծի օգտին:

Օրինագիծն առաջին ընթերցմամբ քվեարկության կդրվի վաղը: